| schema:text
| - സൂര്യനും ഭൂമിയും തമ്മിലുള്ള ദൂരപരിധി ഏറ്റവും കൂടുതലാകുന്ന പ്രതിഭാസമാണ് അപ്ഹീലിയണ്. പൊതുവെ ജൂലൈ മാസത്തില് സംഭവിക്കാറുള്ള ഈ പ്രതിഭാസം വഴി ഭൂമിയില് അതിശൈത്യം അനുഭവപ്പെടുമെന്ന വിശദീകരണവുമായി ഒരു പോസ്റ്റ് സമൂഹമാധ്യമങ്ങളില് വൈറലാണ്.
'നാളെ മുതല് ഈ വര്ഷം ഓഗസ്റ്റ് 22 വരെ മുന് വര്ഷങ്ങളെ അപേക്ഷിച്ച് തണുപ്പ് കൂടുതലായിരിക്കും. ഇതിനെ അഫെലിയോണ് പ്രതിഭാസം എന്ന് പറയുന്നു. നാളെ 05.27 മുതല് ഭൂമി സൂര്യനില് നിന്ന് വളരെ അകലെയാകുന്ന അഫിലിയോണ് പ്രതിഭാസം നമുക്ക് അനുഭവപ്പെടും. നമുക്ക് ഈ പ്രതിഭാസം കാണാന് കഴിയില്ല, പക്ഷേ അതിന്റെ ആഘാതം നമുക്ക് അനുഭവിക്കാന് കഴിയും. ഇത് 2022 ഓഗസ്റ്റ് വരെ നീണ്ടുനില്ക്കും. പനി, ചുമ, ശ്വാസതടസ്സം തുടങ്ങിയവയെ ബാധിക്കുന്ന തണുപ്പ് മുന്കാല തണുപ്പിനേക്കാള് കൂടുതലായി നമുക്ക് അനുഭവപ്പെടും... ' എന്നു തുടങ്ങുന്ന പോസ്റ്റിന്റെ പൂര്ണ്ണരൂപം താഴെ കാണാം.
എന്നാല്, പ്രചരിക്കുന്ന വാദം തെറ്റിദ്ധരിപ്പിക്കുന്നതാണെന്ന് ഇന്ത്യാ ടുഡേയുടെ ആന്റി ഫേക്ക് ന്യൂസ് വാര് റൂം(AFWA) കണ്ടെത്തി. അപ്ഹീലിയണ് പ്രതിഭാസം വഴി അതിശൈത്യം അനുഭവപ്പെടും എന്നത് തെറ്റായ സന്ദേശമാണ്.
AFWA അന്വേഷണം
സൂര്യനും ഭൂമിയും തമ്മിലുള്ള ദൂരം കൂടുന്നതുകൊണ്ട് സൂര്യപ്രകാശം കുറച്ച് മാത്രം ലഭിക്കുമെന്നും ഇതുവഴി അതിശൈത്യം ഉണ്ടാകാന് ഇടയുണ്ടെന്നുമാണ് പോസ്റ്റില് പറയുന്ന പ്രധാന കാര്യം. മറ്റൊന്ന് ഭൂമിയും സൂര്യനും തമ്മിലുള്ള ദൂരപരിധി പ്രതിപാദിക്കുന്നതാണ്. ഭൂമിയില് നിന്ന് സൂര്യനിലേക്കുള്ള ദൂരം 5 പ്രകാശ മിനിറ്റ് അല്ലെങ്കില് 90,000,000 കി.മീ ആണെന്നും അഫെലിയോണ് എന്ന പ്രതിഭാസം കാരണം ഇത് 66% വര്ധിച്ച് 152,000,000 കി.മീ വരെയാകുമെന്നുമാണ് പോസ്റ്റില് ഉന്നയിക്കുന്ന മറ്റൊരു വിവരം. എന്നാല് ഇവയെല്ലാം തന്നെ തെറ്റിദ്ധരിപ്പിക്കുന്ന വിവരമാണ്. ഇവ ഓരോന്നായി നമുക്ക് പരിശോധിക്കാം.
എന്താണ് അപ്ഹീലിയണ്?
ഒരു ഗ്രഹമോ(Planet), ധൂമകകേതുവോ(Comet) അല്ലെങ്കില് മറ്റെന്തെങ്കിലും ആകാശ വസ്തുക്കളോ സൂര്യനില് നിന്ന് ഏറ്റവും അകലെ ആയിരിക്കുന്നതിനെയാണ് അപ്ഹീലിയണ്(Aphelion) എന്ന് പറയുന്നത്. ഇതേ വസ്തുക്കള് സൂര്യനോട് ഏറ്റവും അടുത്ത് നില്ക്കുന്ന പ്രതിഭാസത്തെ പെരിഹീലിയണ്(Perihelion) എന്നും പറയുന്നു. അപ്ഹീലിയണ് സാധാരണയായി ജൂലൈ മാസത്തിലും പെരിഹീലിയണ് ജനുവരി മാസത്തിലുമാണ് അനുഭവപ്പെടുന്നത്. അപ്ഹീലിയണ് പ്രതിഭാസത്തില് ഭൂമിയും സൂര്യനും തമ്മില് ഏകദേശം 48,00000 കിലോമീറ്റര് അഥവാ 30,00000 മൈല് ദൂരമാണ് അനുഭവപ്പെടുന്നതെന്ന് ബ്രിട്ടാണിക്കയില് പ്രതിപാദിക്കുന്നുണ്ട്.
അപ്ഹീലിയണ്, പെരിഹീലിയണ് പ്രതിഭാസങ്ങള് എന്താണെന്നുള്ള ഗ്രാഫിക്കല് റെപ്രസന്റേഷന് കണ്ടാല് അല്പം കൂടെ വ്യക്തത ലഭിക്കും. ഇത് താഴെ കാണാം.
അപ്ഹീലിയണ് 2022
അപ്ഹീലിയണ് സാധാരണയായി ജൂലൈ മാസത്തിലാണ് സംഭവിക്കുകയെന്ന് മനസിലാക്കാനായല്ലോ. ഈ വര്ഷമിത് എപ്പോഴാണെന്ന് പരിശോധിച്ചപ്പോള് യുഎസിന്റെ ആസ്ട്രൊനോമിക്കല് ആപ്ലിക്കേഷന് ഡിപ്പാര്ട്ട്മെന്റിന്റെ വെബ്സൈറ്റില് ഇതു സംബന്ധിക്കുന്ന വിവരം കണ്ടെത്തി. 2022 ജൂലൈ നാലിന് 9.11ന് അപ്ഹീലിയണ് സംഭവിച്ചു. പെരിഹീലിയണ് ജനുവരി നാലിനായിരുന്നുവെന്നും ഇതില് വ്യക്തമാക്കുന്നുണ്ട്.
അതായത് പോസ്റ്റില് പറയുന്നത് ജൂലൈ നാല് മുതല് ഓഗസ്റ്റ് 22വരെ അപ്ഹീലിയണ് സംഭവിക്കുമെന്നത് തെറ്റായ വിവരമാണെന്ന് വ്യക്തമായി.
സൂര്യനും ഭൂമിയും തമ്മിലുള്ള ദൂരം
ദീര്ഘവൃത്താകൃതി(Oval Shape) യിലുള്ള ഒരു ഭ്രമണപഥത്തിലാണ് ഭൂമി സൂര്യനു ചുറ്റും സഞ്ചരിക്കുന്നത്. അതിനാല്, ഭൂമിയും സൂര്യനും തമ്മിലുള്ള ദൂരം വര്ഷം മുഴുവനും മാറുന്നു. എന്നിരുന്നാലും, ഭൂമിയില് നിന്ന് സൂര്യനിലേക്കുള്ള ശരാശരി ദൂരം ഏകദേശം 93 ദശലക്ഷം മൈല് (150 ദശലക്ഷം കിലോമീറ്റര്) ആണ്. ശാസ്ത്രജ്ഞര് ഈ ദൂരത്തെ ഒരു ജ്യോതിശാസ്ത്ര യൂണിറ്റ് (AU) എന്നും വിളിക്കുന്നു. Space.com, NASA എന്നിവയുടെ വെബ്സൈറ്റുകളില് ഇതു സംബന്ധിക്കുന്ന വിവരം ലഭ്യമാണ്.
ഇതില് നിന്ന് പോസ്റ്റില് പറയുന്നതല്ല യഥാര്ഥത്തില് ഭൂമിയും സൂര്യനും തമ്മിലുള്ള ദൂരം എന്ന് വ്യക്തമായി. പിന്നീട് ഞങ്ങള് അന്വേഷിച്ചത് അപ്ഹീലിയണ് പ്രതിഭാസം കൊണ്ട് പ്രകൃതിക്ഷോഭമുണ്ടാകാറുണ്ടോ എന്നാണ്.
അപ്ഹീലിയണ് പ്രകൃതിക്ഷോഭത്തിന് കാരണമാകുമോ
ഇതെക്കുറിച്ച് തിരഞ്ഞപ്പോള് യൂണിവേഴ്സിറ്റി ഓഫ് സതേണ് മറൈന് പ്രസിദ്ധീകരിച്ച ഒരു ലേഖനം ലഭ്യമായി. ഇതുപ്രകാരം സൂര്യനും ഭൂമിയും തമ്മിലുള്ള ദൂരവ്യത്യാസം താപനിലയെ ബാധിക്കുന്നില്ല എന്നാണ്.
കൂടുതല് വിശദീകരണത്തിനായി കേരള സ്റ്റേറ്റ് ഡിസാസ്റ്റര് മാനേജ്മെന്റ്(KSDMA) ഉദ്യോഗസ്ഥനും കാലാവസ്ഥാ വിദഗ്ധനുമായ രാജീവന് ഇരിക്കുളത്തെ ബന്ധപ്പെട്ടു. അദ്ദേഹം നല്കിയ വിവരം അനുസരിച്ച് സമൂഹമാധ്യമങ്ങളിലെ പ്രചാരണം തികച്ചും അടിസ്ഥാന രഹിതമാണ്.
'രണ്ടാഴ്ചയോളമായി ഞാന് ഈ പോസ്റ്റുകള് കാണുന്നുണ്ട്. പലരും എനിക്ക് അയച്ചു തന്നിരുന്നു. ഇതില് പറയുന്ന ഭൂരിഭാഗം കാര്യങ്ങളും അടിസ്ഥാനരഹിതമാണ്. ആദ്യമായി തിരുത്തേണ്ടത് 'അഫിലിയോണ്' എന്ന വാക്കാണ്. ഇത് യഥാര്ഥത്തില് അപ്ഹീലിയണ് എന്നാണ്. ഭൂമി സൂര്യനെ വലം വയ്ക്കുന്നത് ദീര്ഘവൃത്താകൃതിയിലാണ്. അതുകൊണ്ട് ഭ്രമണപഥങ്ങളുടെ ദൂരത്തില് വ്യത്യാസമുണ്ടാകും. ചിലഭാഗങ്ങളില് എത്തുമ്പോള് ദൂരക്കൂടുതലും ചിലഭാഗങ്ങളില് ദൂരക്കുറവും അനുഭവപ്പെടും. സൂര്യനില് നിന്ന് ഭൂമി ഒരുപാടകലെ വരുമ്പോഴാണ് അപ്ഹീലിയണ് എന്നപേരില് അറിയപ്പെടുന്നത്. ഇനി ഭൂമി സൂര്യനോട് ഏറ്റവും അടുത്താണെങ്കില് അതിനെ പെരിഹീലിയണ് എന്ന് വിളിക്കും. സാധാരണയായി ജൂലൈ മാസത്തിലാണ് അപ്ഹീലിയണ് പ്രതിഭാസം ഉണ്ടാകുന്നത്. ഇപ്പോള് അപ്ഹീലിയണ് ആണെന്നത് സത്യമാണ്. എന്നാല് ഇതുവഴി യാതൊരു പ്രകൃതിക്ഷോഭവും ഉണ്ടാകാറില്ല. കാരണം നമ്മളെ ഇത് നേരിട്ട് ബാധിക്കുന്നില്ല. ഇപ്പോള് നമുക്ക് കാലവര്ഷമാണല്ലോ. അതുകൊണ്ടാണ് തണുപ്പ് കൂടുന്നതും പകര്ച്ച വ്യാധികള് വരുന്നതും. അത് അപ്ഹീലിയണ് കൊണ്ടാണെന്ന പ്രചാരണം അടിസ്ഥാന രഹിതമാണ്. നമ്മുടെ കാലാവസ്ഥാ വ്യതിയാനം മഴയെ ആശ്രയിച്ചാണ്. കൂടാതെ അപ്ഹീലിയണ് 2022ല് മാത്രം ഉണ്ടാകുന്ന പ്രതിഭാസമല്ല. വര്ഷങ്ങളായി തുടരുന്ന ഒന്നാണ്. അതുകൊണ്ട് ഈ വര്ഷം അതിശൈത്യം ഉണ്ടാകും എന്നൊക്കെ പറയുന്നത് ശാസ്ത്രീയമായി ശരിയല്ല എന്ന് അറിയിക്കട്ടെ.' രാജീവന് ഇരിക്കുളം ഇന്ത്യാ ടുഡേയോട് പറഞ്ഞു.
ലഭ്യമായ വിവരങ്ങളില് നിന്ന് അപ്ഹീലിയണ് അതിശൈത്യം ഉണ്ടാക്കുമെന്നുള്ള പ്രചാരണം അടിസ്ഥാനരഹിതമാണെന്ന് വ്യക്തം.
അപ്ഹീലിയണ് പ്രതിഭാസം അതിശൈത്യത്തിന് കാരണമാകുന്നു.
ഭൂമിയും സൂര്യനും തമ്മിലുള്ള അകലം ഏറ്റവും കൂടുതല് അനുഭവപ്പെടുന്ന പ്രതിഭാസമാണ് അപ്ഹീലിയണ്. ഭൂമി ദീര്ഘവൃത്താകൃതിയില് സൂര്യന വെലംവയ്ക്കുന്നതിനാലാണ് ഭ്രമണത്തില് ദൂരവ്യത്യാസം അനുഭവപ്പെടുന്നത്. വര്ഷങ്ങളായി നടക്കുന്ന സ്വാഭാവികമായ ഈ പ്രതിഭാസം യാതൊരു കാലാവസ്ഥാ മാറ്റത്തിനും കാരണമാകുന്നില്ല.
|
![[RDF Data]](/fct/images/sw-rdf-blue.png)
![[cxml]](/fct/images/cxml_doc.png)
![[csv]](/fct/images/csv_doc.png)
![[text]](/fct/images/ntriples_doc.png)
![[turtle]](/fct/images/n3turtle_doc.png)
![[ld+json]](/fct/images/jsonld_doc.png)
![[rdf+json]](/fct/images/json_doc.png)
![[rdf+xml]](/fct/images/xml_doc.png)
![[atom+xml]](/fct/images/atom_doc.png)
![[html]](/fct/images/html_doc.png)