| schema:text
| - Keqpërdorimi i imazhit të gazetares për shitje të produkteve të dyshimta
Deklarata
Gjinekologia e njohur zbuloi sekretin e shëndetit të femrave dhe largimit nga cistiti!
Vlerësimi
Rrenë
Është e rreme përmbajtja e videos së shpërndarë me mbishkrimin “Gjinekologia e njohur zbuloi sekretin e shëndetit të femrave dhe largimit nga cistiti!. Dëshira e vazhdueshme për të urinuar, djegie në vende intime, dhimbje në pjesën e poshtme të barkut dhe erë e pakëndhsme e urinës. Kjo recetë e thjeshtë do t’ju shpëtojë nga të gjitha problemet.” Në këtë video është keqpërdorur fotografia e gazetares së emisionit Klinika 24, Doreada Mio, e cila është prezantuar si gjenekologe. Në këtë video nuk është treguar asnjë recetë për trajtimin e cistitit. Urologu Isa Haxhiu ka thënë se cistiti është pezmatim akut ose kronik i fshikëzës urinare, i cili duhet të trajtohet vetëm pasi i njëjti të dignostifikohet nga profesionistët përmes analizave.
Artikulli
Më 03.01.2025, faqja në Facebook Violeet (arkiva) ka publikuar një artikull rreth shërimit të cistitit.
“Gjinekologia e njohur zbuloi sekretin e shëndetit të femrave dhe largimit nga cistiti!”- shkruan në titullin e këtij artikulli, megjithëkëtë nuk është publikuar emri i ndonjë gjinekologeje.
“Dëshira e vazhdueshme për të urinuar, djegie në vende intime, dhimbje në pjesën e poshtme të barkut dhe erë e pakëndhsme e urinës. Kjo recetë e thjeshtë do t’ju shpëtojë nga të gjitha problemet”- shkruan në këtë artikull.
Në këtë video është publikuar një fotografi në të cilën thuhet se është gjinekologia ajo e cila e ka rekomanduar një trajtim të tillë.
Përmes kërkimit të fotografisë në PimEyes, Krypometër ka gjetur se personi në fotografi nuk është gjinekologe, mirëpo është gazetarja e emisionit Klinika 24, Doreada Mio.
Kur klikon mbi këtë lajm, linku të dërgon te uebfaqja brhs.kavemaxt.sbs (arkiva), në të cilin është publikuar një artikull për keçapin dhe kombinimin e tij gjatë gatimit, mirëpo nuk ka asnjë informatë për problemet urinare dhe shërimin e tyre, si është paralajmëruar në postimin në faqen Violeet (arkiva).
Krypometër ka kërkuar edhe informacione të tjera të kësaj faqeje, e cila është krijuar më 04.10.2021 dhe menaxherët e faqes janë nga SHBA, Ukraina dhe Filipinet.
Çka është cistiti?
Urologu Isa Haxhiu ka thënë se cistiti është pezmatim akut ose kronik i fshikëzës urinare.
“Pezmatimi ndodh si rezultat i invadimit me bakterie, parazitë ose kërpudha, që zakonisht vijnë nga ambienti i jashtëm e rrallë nga një pezmatim i organeve fqinje të fshikëzës së urinës. Kontaminimi ndodh zakonisht nga zorra e trashë, e cila është e kontaminuar nga shkaktarët e sipërpërmendur. Më shpesh ndodh te gratë dhe te fëmijët, për shkak të kontaktit të afërm të uretrës (urinënxjerrësit) me zorrën e trashë. Ndodh edhe te meshkujt, por më rrallë dhe vjen e shpeshtohet pas moshës 50-60 vjeçare, për shkak të problemeve që në këtë moshë fillon të paraqesë prostata (urinimi i vështirësuar).”- ka thënë Haxhiu.
Ai ka thënë se disa prej simptomave të cistitit janë: urinim i shpeshtë i përcjellë me djegësim, dhembje në fund të barkut, irritim i lëkurës dhe kruarje e organeve gjenitale (te gratë), ethe dhe temperaturë.
Për trajtim të këtij problemi shëndetësor, Haxhiu rekomandon që të merret mendimi i mjekut i bazuar në rezultate të analizave.
“Mënyra më e mirë e mjekimit është paraqitja sa më e hershme te mjeku dhe marrja e terapisë adekuate, pra paraprakisht të bëhet një urinokulturë me antibiogram, e cila na tregon për shkaktarin që e ka shkaktuar sëmundjen (izolimi i bakteries, parazitëve ose kërpudhave) dhe testimi në antibiotik (antibiogrami) duke zgjedhur barin adekuat për të luftuar shkaktarin.”- ka shtuar tutje Haxhiu.
Ai ka thënë se mjekimi mund të zgjasë nga 7 deri në 14 ditë dhe nuk len pasoja.
“Nëse nuk mjekohet si duhet, atëherë kjo mund të kalojë në një cistit kronik.”- ka shtuar urologu Haxhiu.
Ai po ashtu ka këshilluar qytetarët të cilët mund të kenë ndonjë telash të kësaj natyre, të drejtohen te mjeku kompetent, e jo të marrin barna pa konsulta paraprake.
“Në kohën në të cilën po jetojmë, reklamimi i ‘barërave’ përmes internetit dhe rrjeteve sociale vërtetë shkakton një kakofoni. ‘Mjekimi’ për pacientët jo vetëm është i dëmshëm për shëndetin, por edhe i rëndë për xhepin e pacientit, sepse ato në realitet nuk janë barëra adekuate, por suplemente të ndryshme, që janë edhe të shtrenjta edhe të paefektshme.”- ka këshilluar urologu Haxhiu.
|
![[RDF Data]](/fct/images/sw-rdf-blue.png)
![[cxml]](/fct/images/cxml_doc.png)
![[csv]](/fct/images/csv_doc.png)
![[text]](/fct/images/ntriples_doc.png)
![[turtle]](/fct/images/n3turtle_doc.png)
![[ld+json]](/fct/images/jsonld_doc.png)
![[rdf+json]](/fct/images/json_doc.png)
![[rdf+xml]](/fct/images/xml_doc.png)
![[atom+xml]](/fct/images/atom_doc.png)
![[html]](/fct/images/html_doc.png)