| schema:text
| - വയനാട് ദുരന്തബാധിത മേഖലയിലെ കടങ്ങള് എഴുതിത്തള്ളുമെന്ന് കേരള ബാങ്ക് പ്രഖ്യാപിച്ചിരുന്നു. ദുരിത ബാധിതര്ക്ക് ഒരു കൈത്താങ്ങ് എന്ന നിലയിലുള്ള ഈ പ്രഖ്യാപനത്തിനുശേഷം കേരള ബാങ്കിനെതിരെ സമൂഹമാധ്യമങ്ങളില് വ്യാപകമായ പ്രചാരണമുണ്ട്. ദുരന്തബാധിത മേഖലയിലെങ്ങും തന്നെ കേരള ബാങ്കിന് ബ്രാഞ്ചുകളൊന്നുമില്ലെന്നും വ്യാജ വാഗ്ദാനം നല്കി ജനങ്ങളെ പറ്റിക്കുന്നു എന്നുമാണ് സോഷ്യമീഡിയയില് പ്രചരിക്കുന്നത്.
"ചൂരല്മലയിലും. മുണ്ടകൈയിലും ഒരു ശാഖ പോലുമില്ലാത്ത കേരള ബാങ്ക് ചൂരല്മല ശാഖയിലെ വായ്പകള് എഴുതി തള്ളി ഒരു ഒന്ന് ഒന്നര തള്ളായിപ്പോയി.! " എന്നുള്ള ഫേസ്ബുക്ക് പോസ്റ്റിന്റെ പൂര്ണ്ണരൂപം താഴെ കാണാം.
എന്നാല്, പ്രചരിക്കുന്ന പോസ്റ്റുകള് തെറ്റിദ്ധരിപ്പിക്കുന്നതാണെന്ന് ഇന്ത്യാ ടുഡേയുടെ അന്വേഷണത്തില് കണ്ടെത്തി. കേരള ബാങ്കിന് ചൂരല്മലയില് ശാഖയുണ്ട്, ഇത് ഇപ്പോഴും പ്രവര്ത്തിക്കുന്നുമുണ്ട്.
ഫേസ്ബുക്ക് പോസ്റ്റിന്റെ ആര്ക്കൈവ് ചെയ്ത ലിങ്ക്
അന്വേഷണം
കേരള ബാങ്കിന്റെ വയനാട് ജില്ലയിലെ ശാഖകളെപ്പറ്റിയാണ് ഞങ്ങള് ആദ്യം പരിശോധിച്ചത്. കേരള ബാങ്ക് വെബ്സൈറ്റില് നല്കിയിട്ടുള്ള വിവരം അനുസരിച്ച് വയനാട് ജില്ലയില് ബാങ്കിന് 36 ശാഖകളുണ്ട്. ഇതില് ചൂരല്മല ശാഖയുടെ വിവരങ്ങളും ലഭ്യമാണ്. MKH ബില്ഡിംഗ്, ചൂരല്മല, വെള്ളാര്മല പിഓ എന്ന വിലാസത്തിലുള്ള ബ്രാഞ്ചിന്റെ IFSC കോഡ് സഹിതമുള്ള വെബ്സൈറ്റ് സ്ക്രീന്ഷോട്ട് ചുവടെ കാണാം.
വയനാട് ദുരന്തമേഖലയിലെ വായ്പകള് കേരള ബാങ്ക് എഴുതിത്തള്ളിയതുമായി ബന്ധപ്പെട്ട വാര്ത്തകളും ഞങ്ങള് പരിശോധിച്ചു. 2024 ഓഗസ്റ്റ് 12ന് ന്യൂസ് 18 കേരള നല്കിയ റിപ്പോര്ട്ട് പ്രകാരം ഉരുള്പൊട്ടല് ദുരന്തത്തിന്റെ പശ്ചാത്തലത്തില് ചൂരല്മല ശാഖയിലെ വായ്പകള് എഴുതിത്തള്ളാന് കേരള ബാങ്ക് ഭരണസമിതി തീരുമാനമെടുത്തതായി വ്യക്തമാക്കുന്നുണ്ട്. മരണപ്പെട്ടവരുടെയും, വീടും സ്ഥലവും നഷ്ടപ്പെട്ടവരുടെയും മുഴുവന് വായ്പകളും എഴുതിത്തള്ളാനാണ് തീരുമാനം.
ഓഗസ്റ്റ് 14ന് ദേശാഭിമാനി ഓണ്ലൈന് നല്കിയ വാര്ത്തയില് കേരള ബാങ്കിന്റെ ചൂരല്മല ശാഖയില് ദുരന്തബാധിത മേഖലയില് നിന്നുള്ള 213 വായ്പക്കാര് ഉണ്ടെന്നും 6.63 കോടി രൂപ ഇവര്ക്ക് വായ്പ നല്കിയിട്ടുണ്ടെന്നും വ്യക്തമാക്കുന്നുണ്ട്. ഇതിനു പുറമെ നാനൂറിലേറെ സ്വര്ണ്ണ വായ്പകളുമുണ്ട്. ഇതുവരെ ചൂരല്മല ബ്രാഞ്ചിലെ വായ്പക്കാരായ ഒമ്പത് പേരുടെ മൃതദേഹം ലഭിച്ചിട്ടുണ്ട്. 15 പേര് കാണാതായവരുടെ പട്ടികയിലും ഉള്പ്പെട്ടിട്ടുള്ളതായും വാര്ത്തയില് പറയുന്നു.
ചൂരല്മല ബ്രാഞ്ചിലെ വായ്പകള് സംബന്ധിച്ച ഔദ്യോഗിക വിശദീകരണത്തിനായി ഞങ്ങള് കേരള ബാങ്ക് പബ്ലിക് റിലേഷന്സ് വിഭാഗവുമായി ബന്ധപ്പെട്ടു. ചൂരല്മലയില് കേരള ബാങ്കിന് ശാഖയില്ലെന്ന പ്രചാരണം അടിസ്ഥാന രഹിതമാണെന്ന് കേരള ബാങ്ക് പിആര്ഒ വ്യക്തമാക്കി. " മുണ്ടക്കൈയില് കേരള ബാങ്കിന് ശാഖയില്ല, എന്നാല് ചൂരല്മലയിലുണ്ട്. ഇവിടെ നിന്ന് വായ്പയെടുത്ത ദുരന്തബാധിതരുടെ കടം എഴുതി തള്ളാന് തത്വത്തില് തീരുമാനമെടുത്തിട്ടുണ്ട്. എന്നാല് ഇത് എത്ര രൂപയാണെന്ന കണക്കുകള് പൂര്ണ്ണമായി തിട്ടപ്പെടുത്തിയിട്ടില്ല, പരിശോധിച്ച് വരുന്നതേയുള്ളൂ. വരും ദിവസങ്ങളില് ഇത് പ്രസിദ്ധപ്പെടുത്താന് സാധിക്കുമെന്ന് പ്രതീക്ഷിക്കുന്നു. ബാങ്കിലെ മുഴുവന് കടങ്ങളും വേണ്ടെന്ന് വയ്ക്കാന് സാധിക്കില്ല, ദുരന്തബാധിതരുടെ കടങ്ങള് മാത്രമാണ് എഴുതിത്തള്ളുന്നത്. ഉരുള്പൊട്ടലില് ചൂരല്മല ശാഖയ്ക്ക് കാര്യമായ തകരാറുണ്ടായില്ല, എന്നാല് ചെളിയും മണ്ണും അടിഞ്ഞ നിലയിലായതിനാല് അവിടേയ്ക്ക് ജീവനക്കാര്ക്ക് എത്തിപ്പെടാന് സാധിക്കില്ല. അതിനാല് മേപ്പാടിയിലേക്ക് ബ്രാഞ്ചിന്റെ പ്രവര്ത്തനം താത്ക്കാലികമായി മാറ്റിയിട്ടുണ്ട്, " കേരള ബാങ്ക് പ്രിന്സിപ്പല് പിആര്ഒ ഇന്ത്യാ ടുഡേയോട് പറഞ്ഞു.
കേരള ബാങ്ക് ചൂരല്മല ശാഖയുടെ നിലവിലെ ചിത്രവും പിആര്ഒ ഞങ്ങള്ക്ക് കൈമാറി, ഇത് ചുവടെ കാണാം.
വായ്പകള് എഴുതിത്തള്ളിയതുമായി ബന്ധപ്പെട്ട തീരുമാനം വന്നപ്പോള് ചൂരല്മലയിലെ കേരള ബാങ്ക് ശാഖയുടെ മുന്നില് നിന്ന് ഏഷ്യനെറ്റ് ന്യൂസ് പങ്കുവച്ച റിപ്പോര്ട്ട് ചുവടെ കാണാം.
ലഭ്യമായ വിവരങ്ങളില് നിന്ന് വയനാട് ദുരന്തത്തില്പ്പെട്ടവരുടെ കടം എഴുതിത്തള്ളാനുള്ള കേരള ബാങ്കിന്റെ തീരുമാനവുമായി ബന്ധപ്പെട്ടുള്ള സോഷ്യല് മീഡിയ പ്രചാരണം തെറ്റിദ്ധരിപ്പിക്കുന്നതാണെന്ന് വ്യക്തം.
വയനാട് ദുരന്തബാധിതരുടെ കടം എഴുതിത്തള്ളുമെന്ന പ്രഖ്യാപിച്ച കേരള ബാങ്കിന് ചൂരല്മലയില് ശാഖ പോലുമില്ല.
കേരള ബാങ്കിന് ചൂരല്മലയില് ശാഖയുണ്ട്. ദുരന്തത്തിനുശേഷം താത്ക്കാലികമായി മേപ്പാടിയിലേക്ക് ചൂരല്മല ശാഖയുടെ പ്രവര്ത്തനം മാറ്റിയിരിക്കുകയാണ്.
|
![[RDF Data]](/fct/images/sw-rdf-blue.png)
![[cxml]](/fct/images/cxml_doc.png)
![[csv]](/fct/images/csv_doc.png)
![[text]](/fct/images/ntriples_doc.png)
![[turtle]](/fct/images/n3turtle_doc.png)
![[ld+json]](/fct/images/jsonld_doc.png)
![[rdf+json]](/fct/images/json_doc.png)
![[rdf+xml]](/fct/images/xml_doc.png)
![[atom+xml]](/fct/images/atom_doc.png)
![[html]](/fct/images/html_doc.png)