| schema:text
| - രാഹുല് ഗാന്ധി നയിക്കുന്ന ഭാരത് ജോഡോ യാത്ര പുരോഗമിക്കുന്നതിനിടെ ഗോവ, രാജസ്ഥാന് എന്നീ സംസ്ഥാനങ്ങളിലെ രാഷ്ട്രീയ നീക്കങ്ങള് ചര്ച്ചയാണ്. അതിനിടെ കോണ്ഗ്രസ് ഭരണകാലത്തെ നേട്ടങ്ങളും കോട്ടങ്ങളും വിശദീകരിച്ചുകൊണ്ട് സമൂഹമാധ്യമങ്ങളിലും സജീവമായ പ്രചാരണങ്ങളുണ്ട്. അത്തരത്തിലൊന്നാണ് കോണ്ഗ്രസ് ഭരണകാലത്ത് സോണിയ ഗാന്ധിയുടെ സമ്പത്ത് വര്ധിച്ചുവെന്ന് അവകാശപ്പെട്ടുള്ള പ്രചാരണം.
' കോണ്ഗ്രസ് ഭരണത്തില് ലോകത്തിലെ നാലാമത്തെ സമ്പന്ന വനിതയായി സോണിയ ഗാന്ധി.
മോദിയുടെ ഭരണത്തില് ഇന്ത്യ ലോകത്തിലെ നാലാമത്തെ ശക്തമായ രാജ്യമായി. വ്യത്യാസം വ്യക്തമാണ്. ' എന്നുള്ള ഫേസ്ബുക്ക് പോസ്റ്റിന്റെ പൂര്ണ്ണരൂപം താഴെ കാണാം.
എന്നാല്, പ്രചരിക്കുന്ന പോസ്റ്റ് തെറ്റിദ്ധരിപ്പിക്കുന്നതാണെന്ന് ഇന്ത്യാ ടുഡേയുടെ ആന്റി ഫേക്ക് ന്യൂസ് വാര് റൂം(AFWA) കണ്ടെത്തി. ലോകത്തിലെ സമ്പന്ന വനിതകളുടെ ലിസ്റ്റില് സോണിയ ഗാന്ധി ഇടംപിടിച്ചിട്ടില്ല.
AFWA അന്വേഷണം
പ്രചരിക്കുന്ന പോസ്റ്റില് പറയുന്നതുപോലെ ലോകത്തിലെ നാലാമത്തെ സമ്പന്ന വനിതയാണോ സോണിയ ഗാന്ധി എന്നകാര്യമാണ് ഞങ്ങള് ആദ്യം പരിശോധിച്ചത്. ഇതിനായി സോണിയ ഗാന്ധിയുടെ ആസ്തി നോക്കി. ഇലക്ഷന് കമ്മിഷനില് 2019ല് സമര്പ്പിച്ചിട്ടുള്ള സത്യവാങ്മൂലം അനുസരിച്ച് സോണിയ ഗാന്ധിയുടെ ആകെ സമ്പാദ്യം 11.82 കോടി രൂപയാണ്. ഇതില് ജംഗമ സ്വത്ത്(Movable asset)-4.29 കോടി രൂപയും ബാങ്കില് 16.5 ലക്ഷം രൂപയുടെ നിക്ഷേപവും 1267.33 ഗ്രാം സ്വര്ണവും 88 കിലോ വെള്ളിയുമാണ് ഉള്പ്പെടുന്നത്. 2014ലെ സത്യവാങ്മൂലത്തില് 9.28 കോടി രൂപയായിരുന്നു സോണിയയുടെ ആകെ സ്വത്ത്. 2019ല് ഇതുസംബന്ധിച്ച് ഇന്ത്യാ ടുഡേയും റിപ്പോര്ട്ട് നല്കിയിരുന്നു.
കോണ്ഗ്രസ് ഭരണകാലയളവില് സോണിയ സമ്പന്നരുടെ പട്ടികയില് ഇടം നേടിയിരുന്നോ എന്നും ഞങ്ങള് പരിശോധിച്ചു. ഫോര്ബ്സ് പുറത്തുവിടുന്ന പട്ടികയിലാണ് ലോകത്തെ സമ്പന്നരുടെ വിവരം ഉള്പ്പെടുന്നത്. രണ്ടാം യുപിഎ സര്ക്കാരിന്റെ അവസാന കാലഘട്ടമായ 2014 ലെ കണക്ക് പരിശോധിച്ചപ്പോള് ഈ പട്ടികയില് ഉള്പ്പെട്ടിട്ടുള്ള 27 വനിതകളില് സോണിയ ഗാന്ധി ഇല്ലെന്ന് മനസിലാക്കാനായി. മറ്റു വര്ഷങ്ങളിലെ കണക്കുകളും പരിശോധിച്ചെങ്കിലും സോണിയ ഗാന്ധിയെക്കുറിച്ച് പ്രതിപാദിക്കുന്നതായി കണ്ടെത്താനായില്ല.
അതേസമയം,ഫോര്ബ്സിന്റെ മോസ്റ്റ് പവര്ഫുള് വിമന് ഇന് ദി വേള്ഡ് എന്ന കാറ്റഗറിയില് (2007 മുതല് 2013 വരെ വിവിധ വര്ഷങ്ങളില്) ആദ്യ പത്തില് സോണിയ ഗാന്ധി ഇടംപിച്ചിട്ടുണ്ട്. ഇതില് സമ്പത്തല്ല അടിസ്ഥാനം,ശക്തയായ വനിത എന്ന രീതിയിലാണ് ഈ കാറ്റഗറിയില് പട്ടിക പ്രസിദ്ധീകരിക്കുന്നത്.
ഫോര്ബ്സ് പട്ടികയ്ക്ക് പുറമെ സിബിസി ന്യൂസ് പുറത്തുവിടുന്ന പട്ടികയും ഞങ്ങള് പരിശോധിച്ചു. എന്നാല് ഇവയിലും സോണിയ ഗാന്ധി ഉള്പ്പെട്ടിട്ടുള്ളതായി കണ്ടെത്താനായില്ല.
അതേസമയം, 2012ല് ചില മാധ്യമ വാര്ത്തകളില് സോണിയ ഗാന്ധി നാലാമത്തെ സമ്പന്ന വനിതയാണ് എന്ന് പറയുന്നുണ്ട്. അമേരിക്ക ആസ്ഥാനമായ ബിസിനസ് ഇന്സൈഡര് നല്കിയ വിവരം അനുസരിച്ചാണ് മാധ്യമങ്ങളുടെ റിപ്പോര്ട്ട്. 2012 മാര്ച്ച് രണ്ടിനാണ് ഇന്സൈഡര് ലിസ്റ്റ് നല്കിയിട്ടുള്ളത്.
ഈ ലിസ്റ്റില് ഇവര് ആധാരമാക്കിയിരിക്കുന്നത് വേള്ഡ്സ് ലക്ഷ്വറി ഗൈഡ്, നാഷണല് ഇലക്ഷന് വാച്ച് ഡാറ്റ എന്നിവയാണ്. ഇതില് ആദ്യ ലിങ്ക് ലഭ്യമല്ല. ഇതേക്കുറിച്ച് സ്വതന്ത്രമായി തിരഞ്ഞപ്പോഴും ഇത്തരമൊരു വെബ്സൈറ്റിന്റെ രേഖകളൊന്നും കാണാന് സാധിക്കുന്നില്ല. രണ്ടാമത്തേത് 2009ല് സോണിയ ഗാന്ധി ഇലക്ഷന് കമ്മിഷന് നല്കിയ അഫിഡവിറ്റാണ്. എന്നാല് ഇതു പ്രകാരം 1.35 കോടി രൂപ മാത്രമാണ് സോണിയ ഗാന്ധിയുടെ സമ്പത്ത്. അതായത് ബിസിനസ് ഇന്സൈഡര് എന്ന പേജില് നല്കിയിരിക്കുന്ന 2-19ബില്യണ് ഡോളര് എന്ന കണക്ക് കൃത്യമല്ലെന്ന് വ്യക്തം.
ഫോര്ബ്സ്, ബൂംബര്ഗ്, വിക്കിപീഡിയ തുടങ്ങിയ പേജുകളില് നിന്നുള്ള വിവരം അനുസരിച്ചാണ് പട്ടിക തയാറാക്കിയിരിക്കുന്നതെന്നാണ് ബിസിനസ് ഇന്സൈഡര് പറയുന്നത്. എന്നാല് ഇന്സൈഡര് ലിസ്റ്റ് പുറത്തിറക്കിയ 2012ല് ഫോര്ബ്സ് നല്കിയ ഇന്ത്യന് സമ്പന്നരുടെ പട്ടികയില് സോണിയ ഗാന്ധി ഉണ്ടായിരുന്നില്ല എന്നതും ശ്രദ്ധേയമാണ്.
സോണിയ ഗാന്ധിക്കെതിരെ 2012 മുതല് പ്രചാരത്തിലുള്ള ഈ ആരോപണം ഇടയ്ക്കിടെ സമൂഹമാധ്യമങ്ങളില് സജീവമാകാറുണ്ട്. കഴിഞ്ഞവര്ഷം ഇതുസംബന്ധിച്ച് ഓള്ട്ട് ന്യൂസ് വിശദമായ ഫാക്ട് ചെക്ക് റിപ്പോര്ട്ട് നല്കിയതും ലഭ്യമായി.
പോസ്റ്റിലെ മറ്റൊരു വിവരം ഇന്ത്യ ലോകത്തെ നാലാം നമ്പര് ശക്തിയായി മാറി എന്നതാണ്. എന്നാല് ഇത്തരത്തില് ഒരു ലിസ്റ്റ് കണ്ടെത്താനായില്ല. അതേസമയം, 2019 മാര്ച്ചില് ടൈംസ് നൗ പ്രസിദ്ധീകരിച്ച ലേഖനത്തില് ആന്റി സാറ്റലൈറ്റ്(അസാറ്റ്) മിസൈലായ 'മിഷന്ശക്തി ' പരീക്ഷണ വിജയം നേടിയ ശേഷം ബഹിരാകാശ മേഖലയില് ഇന്ത്യ നാലാം ശക്തിയായി എന്ന് പ്രതിപാദിക്കുന്നുണ്ട്. അമേരിക്ക, റഷ്യ, ചൈന എന്നീ രാജ്യങ്ങള്ക്ക് ശേഷം ഈ നേട്ടം കൈവരിച്ച നാലാമത്ത രാജ്യമാണ് ഇന്ത്യ. അതിനാലാണ് ബഹിരാകാശ മേഖലയില് ഇന്ത്യയെ നാലാം ശക്തിയായി മാധ്യമങ്ങള് വിശേഷിപ്പിച്ചത്.
ഇതിനു പുറമെ ബിസിനസ് ഇന്സൈഡറിന്റെ മോസ്റ്റ് പവര്ഫുള് നേഷന്സ് എന്ന കാറ്റഗറിയില് ഇന്ത്യ 15-ാം സ്ഥാനത്തുള്ളതായും കണ്ടെത്താനായി. മറ്റൊരു റിപ്പോര്ട്ടുകളിലും ഇന്ത്യ ലോകത്തിലെ നാലാം നമ്പര് ശക്തിയായി എന്ന് പറയുന്നില്ല.
ലഭ്യമായ വിവരങ്ങള് അനുസരിച്ച് കോണ്ഗ്രസ് അധ്യക്ഷ സോണിയ ഗാന്ധിയുടെ സമ്പത്തിനെക്കുറിച്ച് ഇപ്പോള് പ്രചാരത്തിലുള്ള ആരോപണം വസ്തുതാ വിരുദ്ധമാണ്. ലോകത്തെ സമ്പന്നരുടെ പട്ടികയില് സോണിയ ഇടംനേടിയിട്ടില്ല.
കോണ്ഗ്രസ് ഭരണകാലത്ത് സോണിയ ഗാന്ധി ലോകത്തെ സമ്പന്നരുടെ പട്ടികയില് നാലാം സ്ഥാനത്തെത്തിയിരുന്നു. മോദി സര്ക്കാര് വന്നപ്പോള് ഇന്ത്യ ലോകത്തെ നാലാമത്ത ശക്തമായ രാഷ്ട്രമായി.
സോണിയ ഗാന്ധി സമ്പന്നരുടെ പട്ടികയില് ഇടം നേടിയിട്ടില്ല. മാത്രമല്ല ലോകത്തെ നാലാം നമ്പര് ശക്തിയായി ഇന്ത്യ മാറി എന്ന പ്രചാരണത്തിലും വസ്തുതാപരമായ തെറ്റുണ്ട്. ബഹിരാകാശ മേഖലയില് ഇന്ത്യ നാലാമതാണ് എന്നു പറയുന്ന ലേഖനങ്ങളുണണ്ടെങ്കിലും മറ്റു മേഖലകളെപ്പറ്റി പ്രതിപാദിക്കുന്ന ഒരു റിപ്പോര്ട്ടുകളുമില്ല.
|
![[RDF Data]](/fct/images/sw-rdf-blue.png)
![[cxml]](/fct/images/cxml_doc.png)
![[csv]](/fct/images/csv_doc.png)
![[text]](/fct/images/ntriples_doc.png)
![[turtle]](/fct/images/n3turtle_doc.png)
![[ld+json]](/fct/images/jsonld_doc.png)
![[rdf+json]](/fct/images/json_doc.png)
![[rdf+xml]](/fct/images/xml_doc.png)
![[atom+xml]](/fct/images/atom_doc.png)
![[html]](/fct/images/html_doc.png)