| schema:text
| - Ministri Valdrin Lluka - Foto: KALLXO.com
Vonohet përkthimi i kontratave për TC ‘Kosova e Re’
Deklarata
Valdrin Lluka: Kontrata i ka 1000 faqe, përkthimi ka filluar por do të zgjasë deri në 3 muaj, përkthimin po e bën zyra jonë, nuk besoj që ka një kosto të lartë.
Vlerësimi
Rrenë
Kuvendi i Republikës së Kosovës sot do të debatojë për kontratën e nënshkruar në mes të Qeverisë së Kosovës dhe Contour Global për ndërtimin e një termocentralit prej 450 megavatesh. Debati do të bëhet, ndërkohë që 8 marrëveshjet e nënshkruara ende nuk janë përkthyer në gjuhën Shqipe. Premtimi i ministrit Lluka se përkthimi do të përfundojë brenda 3 muajve nuk është mbajtur. Premtimi i radhës është që të njëjtat do të përkthehen deri në fund të muajit maj.
Artikulli
Ministri i Zhvillimit Ekonomik, Valdrin Lluka, në një konferencë për shtyp me 22 janar, pas një takimi me Safet Gërxhaliun, kryetarin e Odës Ekonomike të Kosovës dhe disa prodhuesve vendorë, kishte thënë se përkthimi në gjuhën shqipe i kontratës për termocentralin ‘Kosova e Re’ ka filluar dhe pritet të kryhet brenda tre muajsh.
“Kontrata i ka 1000 faqe, përkthimi ka filluar por do të zgjasë deri në 3 muaj, përkthimin po e bën zyra jonë, nuk besoj që ka një kosto të lartë”, ka potencuar ministri Lluka.
Më 22 prill janë bërë 3 muaj që nga premtimi publik i ministrit Lluka, por përkthimi i tetë marrëveshjeve të kontratës 1.3 miliard euro me ‘Contour Global’ ende nuk ka përfunduar.
Zyra për Informim e ministrisë së Zhvillimit Ekonomik thonë se procesi i përkthimit të tetë marrëveshjeve është duke u kryer me kujdes.
“Për shkak të volumit dhe kompleksitetit të marrëveshjeve, përkthyesit e kontraktuar nga MZHE kanë njoftuar se procesi i përkthimit është duke u kryer me kujdes”, thuhet në përgjigjet e MZHE-së.
Ai ka thënë se përkthimi i dy marrëveshjeve do të përfundojë gjatë kësaj jave.
“Pastaj nga dy marrëveshje në fund të çdo jave pasuese”, ka deklaruar Zeqiri për KALLXO.com.
Nëse përkthimi i tetë marrëveshjeve do të shkoj sipas planit të MZhE-së dhe përkthimi i nga dy marrëveshjeve do të bëhet në çdo javë pasuese atëherë përkthimi do të përfundoj me 27 maj.
Deri më 6 maj, që është ditë e diel dhe fundi i kësaj jave, do të përkthehen dy marrëveshje, deri më 13 maj do të përkthehen dy marrëveshje të tjera, deri më 20 maj do të bëhet përkthimi po ashtu edhe i dy marrëveshjeve. Përkthimi i dy marrëveshjeve të fundit sipas planit të MZhE-së pritet të bëhet deri më 27 maj.
Sipas kësaj llogaritje del se përkthimi i të gjitha marrëveshjeve të kontratës me ‘Contour Global’ do të zgjasë më shumë se katër muaj që nga premtimi i ministrit Valdrin Lluka.
Kontrata 1.3 miliard euro për ndërtimin e TC “Kosova e Re” është nënshkruar në një ceremoni zyrtare më 20 dhjetor të vitit 2017.
Marrëveshja për ndërtimin e termocentralit “Kosova e Re” zyrtarisht u nënshkrua nga Ministri i Zhvillimit Ekonomik, Valdrin Lluka, Joseph Brandt, drejtori ekzekutiv i “Countur Global”, Arben Gjukaj nga Korporata Energjetike e Kosovës (KEK), Kadri Kadriu nga Operatori i Sistemit, Transmisionit dhe Tregut të Energjisë Elektrike të Kosovës (KOSTT) dhe Januz Kabashi, kryeshef ekzekutiv i Ndërmarrjes Ekonomike “Ibër-Lepenci”.
Tetë marrëveshjet e nënshkruara të projektit janë: Marrëveshja e implementimit (Kompania e gjenerimit); marrëveshja e implementimit (kompania e minierave); marrëveshja për blerje të energjisë (TCKR); marrëveshja për furnizim me linjit (Kosova A); Marrëveshja për furnizim me linjit (Kosova B TCKR); Marrëveshje shumëpalëshe për furnizim me linjit; Marrëveshja për furnizim me ujë; Marrëveshja për shërbimet ndihmëse (TCKR).
Këtu mund t’i shkarkoni dhe lexoni të gjitha kontratat e nënshkruara, të cilat janë në gjuhën angleze.
Pas nënshkrimit mbeten edhe tre hapa të tjerë të mëdhenj deri në vitin 2019 kur do të vihet gurthemeli i termocentralit “Kosova e Re”.
Këtë vit do të hapet tenderi për përzgjedhjen e kontraktuesit, në vitin 2019 do të bëhet përmbyllja financiare dhe do të fillojë ndërtimi i termocentralit.
|
![[RDF Data]](/fct/images/sw-rdf-blue.png)
![[cxml]](/fct/images/cxml_doc.png)
![[csv]](/fct/images/csv_doc.png)
![[text]](/fct/images/ntriples_doc.png)
![[turtle]](/fct/images/n3turtle_doc.png)
![[ld+json]](/fct/images/jsonld_doc.png)
![[rdf+json]](/fct/images/json_doc.png)
![[rdf+xml]](/fct/images/xml_doc.png)
![[atom+xml]](/fct/images/atom_doc.png)
![[html]](/fct/images/html_doc.png)