About: http://data.cimple.eu/claim-review/e204c1d8e7d85fe58416e49927f95d8a4dc6679ece0d78d3466d1233     Goto   Sponge   NotDistinct   Permalink

An Entity of Type : schema:ClaimReview, within Data Space : data.cimple.eu associated with source document(s)

AttributesValues
rdf:type
http://data.cimple...lizedReviewRating
schema:url
schema:text
  • നിര്ബന്ധിത മതപരിവര്ത്തനവും ലവ് ജിഹാദുമൊക്കെ കേരളം വളരെയേറെ ചര്ച്ച ചെയ്യുന്ന വിഷയമാണ്. മതപരിവര്ത്തനം നടത്തുന്ന വാര്ത്തകള് മാധ്യമങ്ങള് പ്രാധാന്യത്തോടെ നല്കാറുമുണ്ട്. പാകിസ്ഥാനില് ഇത്തരത്തില് മതപരിവര്ത്തനം നടത്തുന്ന ദൃശ്യങ്ങള് എന്ന പേരില് ഒരു വീഡിയോ ഇപ്പോള് സമൂഹമാധ്യമങ്ങളില് വൈറലാണ്. 'പാകിസ്ഥാനിലെ പെഷവാറിലെ ഹിന്ദുക്കളെയും ചെറിയ ഹിന്ദു കുട്ടികളെയും ഇലക്ട്രിക് സ്റ്റണ് ഗണ്ണിലൂടെ ഷോക്ക്കൊടുത്ത് പീഡിപ്പിച്ച് ഇസ്ലാം മതത്തിലേക്ക് പരിവര്ത്തനം ചെയ്യാന് നിര്ബന്ധിക്കുന്നതിന്റെ വീഡിയോ കാണുക. ഹിന്ദുക്കളെ നിങ്ങളെ എങ്ങിനെ കൈകാര്യം ചെയ്യാം എന്ന കാര്യത്തില് വര്ഷങ്ങള്ക്ക് മുമ്പേ മുസ്ലീം ജീഹാദികള് തീരുമാനം എടുത്തുകഴിഞ്ഞു.' എന്നു തുടങ്ങുന്ന ഫേസ്ബുക്ക് പോസ്റ്റിന്റെ പൂര്ണ്ണരൂപം താഴെ കാണാം. എന്നാല്, പ്രചരിക്കുന്ന വാദം തെറ്റിദ്ധരിപ്പിക്കുന്നതാണെന്ന് ഇന്ത്യാ ടുഡേയുടെ ആന്റി ഫേക്ക് ന്യൂസ് വാര് റൂം(AFWA) കണ്ടെത്തി. ഇത് മതപരിവര്ത്തനത്തിന്റെ ദൃശ്യങ്ങളല്ല. AFWA അന്വേഷണം പ്രചരിക്കുന്ന വീഡിയോയില് കാണാനാകുന്നത് മുസ്ലീം പണ്ഡിതന് എന്നു തോന്നുന്ന ഒരാളുടെ മുന്നില് ഏതാനും ആണ്കുട്ടികള് നിലവിളിച്ചുകൊണ്ട് ഇരിക്കുന്നതാണ്. ചിലര് ബഹളം വയ്ക്കുകയും ഉറക്കെ കരയുകയും ചെയ്യുന്നുണ്ട്. ഇതിനിടയില് അറബി വാചകങ്ങള് സംസാരിച്ചുകൊണ്ട് പണ്ഡിതന് കുട്ടികളോട് സംവദിക്കുന്നുമുണ്ട്. വീഡിയോ സൂക്ഷ്മമായി നിരീക്ഷിച്ചാല് താഴെയായി എന്തോ സ്ക്രോള് പോകുന്നത് കാണാനാകും. ഏപ്രില് 19 2021 എന്ന ഡേറ്റും ദൃശ്യമാകുന്നുണ്ട്. ലൈക്ക്, ഡിസ് ലൈക്ക്, ഷെയര് ഓപ്ഷനുകളില് നിന്ന് ഒരു യുട്യൂബ് ചാനലിന്റെ വിശദാശംങ്ങളായിരിക്കാം എന്ന് മനസിലാകുമെങ്കിലും ചാനലിന്റെ പേര് കാണാനാകുന്നില്ല. എന്നാല് ലൊക്കേഷന് കാണിക്കുന്ന ഭാഗത്ത് 'Achini Meira' എന്നാണ് എഴുതിയിരിക്കുന്നത്. ഇതേപ്പറ്റി തിരഞ്ഞപ്പോള് പാകിസ്ഥാനിലെ പെഷവാര് ആണ് സ്ഥലമെന്ന് മനസിലാക്കാനായി. പിന്നീട് താഴെ സ്ക്രോള് പോകുന്ന അക്ഷരങ്ങള് ഗൂഗിള് ട്രാന്സിലേറ്ററിന്റെ സഹായത്തോടെ പരിഭാഷപ്പെടുത്തിയപ്പോള് പേര്ഷ്യന് ഭാഷയാണെന്ന് വ്യക്തമായി. മതപരിവര്ത്തനമാണ് ദൃശ്യങ്ങളിലുള്ളതെങ്കില് ഇത്തരത്തില് അത് പ്രസിദ്ധീകരിക്കാന് സാധ്യതയുണ്ടാവില്ല എന്ന ധാരണയിലാണ് വീണ്ടും അന്വേഷിച്ചത്. ലഭ്യമായ സൂചന ഉപയോഗിച്ച് കീവേര്ഡ് സെര്ച്ച് ചെയ്തപ്പോള് വീഡിയോയിലുള്ള മതപണ്ഡിതനെന്നു തോന്നിക്കുന്നയാളുടെ യുട്യൂബ് പേജ് ലഭ്യമായി. ഹാജി മുഹമ്മദ് ഉല്ല എന്ന പേരിലുള്ള യുട്യൂബ് ചാനലിന് 80,000ലേറെ സബ്സ്ക്രൈബേഴ്സുണ്ട്. ഏപ്രില് 26ന് ഈ ചാനലില് സമാനമായ ഒരു വീഡിയോ പോസ്റ്റ് ചെയ്തിട്ടുണ്ട്. ഉര്ദു ഭാഷയിലുള്ള അടിക്കുറിപ്പോടെയുള്ള വീഡിയോയില് പറയുന്നത് പ്രേതബാധ ഒഴിപ്പിക്കുന്ന ദൃശ്യമെന്നാണ്. യുട്യൂബ് പേജില് തിരഞ്ഞപ്പോള് സമാനമായ നിരവധി ദൃശ്യങ്ങള് കാണാനായി. മതപരിവര്ത്തനം നടത്തുന്ന ദൃശ്യങ്ങള് എന്ന പേരില് പ്രചരിക്കുന്ന അതേ പശ്ചാത്തലമുള്ള വീഡിയോ തന്നെയാണ് യുട്യൂബ് പേജിലുള്ള ഭൂരിഭാഗം വീഡിയോകളിലും കാണാനാകുന്നത്. ഇവയുടെ താരതമ്യം താഴെ കാണാം. ഹാജി മുഹമ്മദ് ഉല്ലയെക്കുറിച്ച് കൂടുതല് അന്വേഷിച്ചപ്പോള് ഇയാളുടെ ഫേസ്ബുക്ക്, ഇന്സ്റ്റഗ്രാം പേജുകളും ലഭ്യമായി. സമാനമായ നിരവധി വീഡിയോകളാണ് ഈ പേജുകളില് കാണാനായത്. മതപരിവര്ത്തനം എന്ന പേരില് പ്രചരിക്കുന്ന വീഡിയോയും സമാനമായ രീതിയിലുള്ളതാണ്. ഉര്ദു, പേര്ഷ്യന് ഭാഷകളിലാണ് ഈ വീഡിയോകള് അധികവും പോസ്റ്റ് ചെയ്തിട്ടുള്ളത്. തുടര്ന്ന് ഞങ്ങള് ഹാജി മുഹമ്മദ് ഉല്ലയുമായി സംസാരിച്ചു. ' ഇത് എന്റെ യുട്യൂബ് ചാനലില് ഉണ്ടായിരുന്ന വീഡിയോ ആണ്. ഇതില് കാണുന്ന കുട്ടികളുടെ ദേഹത്ത് പ്രേതബാധയുണ്ടായിരുന്നു. അത് ഒഴിപ്പിക്കുന്നതിനാണ് അവരെ മാതാപിതാക്കള് എന്റെ അടുത്ത് കൊണ്ടുവന്നത്. അല്ലാഹുവിന്റെ സഹായത്തോടെ ഞാന് അത് നിര്വഹിച്ചു' മുഹമ്മദ് ഉല്ല പറഞ്ഞു. യുട്യൂബ് ചാനലിന്റെ ലിങ്കും അദ്ദേഹം ഞങ്ങളുമായി പങ്കുവച്ചു. ഹാജി ഉല്ലയെക്കുറിച്ചുള്ള ചില വാര്ത്തകളും ഞങ്ങള്ക്ക് ലഭ്യമായി. 2020ല് പ്രേതോച്ചാടനത്തിന്റെ പേരില് കുട്ടികളെ ഉപദ്രവിച്ചതിന് ഇയാളെ പൊലീസ് അറസ്റ്റ് ചെയ്തിരുന്നു. Duniyanewstv എന്ന മാധ്യമം നല്കിയ വാര്ത്തയില് പെഷവാര് സിറ്റി പൊലീസിന്റെ ട്വീറ്റും ഉള്പ്പെടുത്തിയിരുന്നു. എന്നാല് ഇപ്പോഴും ഇയാളുടെ യുട്യൂബ് പേജുകളില് സജീവമായി വീഡിയോ പങ്കുവയ്ക്കുന്നുണ്ട്. അടുത്തിടെ സമാനമായ രീതിയില് പാകിസ്ഥാനില് നടക്കുന്ന മതംമാറ്റമെന്ന രീതിയില് ഒരു പെണ്കുട്ടിയുടെ വീഡിയോ വൈറലായപ്പോള് ഇന്ത്യാ ടുഡേ ഫാക്ട് ചെക്ക് നടത്തിയിരുന്നു. ഇതും ഹാജി മുഹമ്മദ് ഉല്ലയുടെ വീഡിയോ ആയിരുന്നു. ലഭ്യമായ വിവരങ്ങളില് നിന്ന് പ്രചരിക്കുന്ന വീഡിയോ പ്രേതോച്ചാടനത്തിന്റെതാണെന്നും ഇതിന് മതപരിവര്ത്തനവുമായി ബന്ധമില്ലെന്നും വ്യക്തമായി. പാകിസ്ഥാനില് ഹിന്ദു കുട്ടികളെ നിര്ബന്ധിത മതപരിവര്ത്തനത്തിന് ഇരയാക്കുന്ന ദൃശ്യങ്ങള് ഇത് പാകിസ്ഥാനിലെ പെഷവാറിലുള്ള ഹാജി മുഹമ്മദ് ഉല്ല എന്ന മന്ത്രവാദിയുടെ യുട്യൂബ് ചാനലില് നിന്നുള്ള വീഡിയോയാണ്. മതപരിവര്ത്തനമല്ല, പ്രേതോച്ചാടനത്തിന്റെ വീഡിയോയാണിത്. ഇക്കാര്യം ഹാജി ഉല്ല സ്ഥീരീകരിച്ചു. പ്രേതോച്ചാടനത്തിനിടെ കുട്ടികളെ ഉപദ്രവിച്ചതിന് പെഷവാര് പൊലീസ് മുന്പ് ഇയാളെ അറസ്റ്റ് ചെയ്തിട്ടുമുണ്ട്.
schema:mentions
schema:reviewRating
schema:author
schema:datePublished
schema:inLanguage
  • English
schema:itemReviewed
Faceted Search & Find service v1.16.115 as of Oct 09 2023


Alternative Linked Data Documents: ODE     Content Formats:   [cxml] [csv]     RDF   [text] [turtle] [ld+json] [rdf+json] [rdf+xml]     ODATA   [atom+xml] [odata+json]     Microdata   [microdata+json] [html]    About   
This material is Open Knowledge   W3C Semantic Web Technology [RDF Data] Valid XHTML + RDFa
OpenLink Virtuoso version 07.20.3238 as of Jul 16 2024, on Linux (x86_64-pc-linux-musl), Single-Server Edition (126 GB total memory, 11 GB memory in use)
Data on this page belongs to its respective rights holders.
Virtuoso Faceted Browser Copyright © 2009-2025 OpenLink Software