| schema:text
| - Ambasada e Britanisë së Madhe mohon t’i kenë vendosur kushte Kosovës për themelimin e Asociacionit
Deklarata
Edhe Britania vendos kushte ndaj Kosovës, asociacioni duhet tani
Vlerësimi
Me kos
Artikulli me titull “Edhe Britania vendos kushte ndaj Kosovës, asociacioni duhet tani” është i rremë. Ambasada e Britanisë së Madhe në Kosovë ka thënë se raportimi se ata i kanë vendosur Kosovës kusht që të formojë asociacionin para anëtarësimit në Këshillin e Europes (KiE) është i rremë. Artikulli është bazuar në deklaratën e ambasadorit të Mbretërisë së Bashkuar në Organizatën për Siguri dhe Bashkëpunim në Evropë (OSBE), Neil Holland, i cili megjithatë në deklarimin e plotë të tij nuk ka thënë se formimi i asociacionit është kusht për anëtarësimin e Kosovës në KiE.
Artikulli
Më 10.05.2024 ueb faqja online ntv.al (arkiva) ka publikuar një artikull me titull “Edhe Britania vendos kushte ndaj Kosovës, asociacioni duhet tani”.
I njëti është publikuar edhe në faqet e Facebook-ut “Ntv Televizion (arkiva)” dhe “Lajme Shqip (arkiva)”.
Ky artikull është publikuar në kohën kur tashmë ishte bërë publike kërkesa e disa shteteve anëtare të BE së dorëzimi i draft-statutit të Asociacionit në Gjykatën Kushtetuese është një kriter për anëtarësimin e Kosovës në Këshillin e Europës.
Shpërputhje në mes të titullit dhe përmbajtjes së artikullit
Britania e Madhe është anëtare e Këshillit të Europës, megjithatë ata nuk e kanë kushtëzuar Kosovën për anëtarësim në këtë institucion.
Pas analizës, Krypometër ka gjetur se faktet e paraqitura në titull nuk përputhen me përmbajtjen në artikull.
Në përmbajtjen e artikullit është cituar ambasadori i Mbretërisë së Bashkuar në Organizatën për Siguri dhe Bashkëpunim në Evropë (OSBE), Neil Holland duke thënë se Kosova duhet të përmbushë detyrimet e saj nga Marrëveshja e Brukselit/ Ohrit “me theks të veçantë Asociacionin e Komunave me Shumicë Serbe”.
Krypometër ka gjetur deklaratën e plotë të ambasadorit, i cili ka deklaruar se Mbretëria e Bashkuar mirëpret përparimin në dhjetor të 2023 në udhërrëfyesin e energjisë dhe targat, shumë çështje themelore mbeten të pazgjidhura, teksa ka inkurajuar palët, Kosovën dhe Serbinë, që të angazhohen në mënyrë konstruktive në dialogun e lehtësuar nga BE-ja dhe të përmbushin detyrimet e tyre përkatëse, duke përfshirë themelimin e Asociacionit të Komunave me Shumicë Serbe.
Mirëpo, në deklaratën e Holland nuk përmendet asnjë kushtëzim për themelimin e Asociacionit për anëtarësim në Këshillin e Europës.
“Ne inkurajojmë të dyja palët që të angazhohen në mënyrë konstruktive në dialogun e lehtësuar nga BE-ja dhe të përmbushin detyrimet e tyre përkatëse, duke përfshirë themelimin e Asociacionit të Komunave me Shumicë Serbe”- ka deklaruar ambasadori gjatë një diskutimi për raportin gjashtëmujor i Misionit të OSBE-së në Kosovë.
Cili ishte qëndrimi Britanisë së Madhe?
Edhe Ambasada e Britanisë së Madhe ka mohuar që ambasadori të ketë vënë ndonjë kusht.
“Nuk është e vërtetë”- thuhet në përgjigjen e ambasadës për Krypometrin.
Ministrat e Jashtëm të shteteve anëtare të Këshillit të Evropës (KiE) kanë zhvilluar një mbledhje më 17.05.2024. Çështja e anëtarësimit të Kosovës në këtë organizatë nuk ka hyrë në agjendën e kësaj mbledhjeje.
Në Kosovë kishte pritshmëri se në këtë takim do të vulosej që shteti më i ri në Europë do të bëhej anëtar i 47-të i KiE-së.
Por, nga disa shtete Kosovës i është kërkuar dorëzimi i projektstatutit për themelimin e Asociacionit të Komunave me Shumicë Serbe në Gjykatë Kushtetuese si hap për të fituar mbështetjen e shumicës së përfaqësuesve të shteteve anëtare të KiE-së për anëtarësim në këtë organizatë.
Ministrja e Punëve të Jashtme dhe Diasporës, Donika Gërvalla- Schwarz, më 16.05.2024, i ka dërguar letër Presidentit të Asamblesë Parlamentare të Këshillit të Evropës për, siç ka thënë ajo, zotimin për përgatitjen e një drafti që parasheh “krijimin e një mekanizmi për vetmenaxhim”.
Ky draft, siç ka thënë Gërvalla, do të dërgohet për interpretim në Gjykatën Kushtetuese deri në fund të muajit maj 2024.
Letra e Gërvallës nxiti reagime të shumta brenda dhe jashtë vendit dhe rezultoi se ishte dërguar pa u koordinuar me presidenten e shtetit, Vjosa Osmani, dhe e njëjta nuk ka arritur të ketë efekt pasi anëtarësimi i Kosovës në Këshillin e Europes nuk ka hyrë në agjenden e Këshillit të Ministrave.
|
![[RDF Data]](/fct/images/sw-rdf-blue.png)
![[cxml]](/fct/images/cxml_doc.png)
![[csv]](/fct/images/csv_doc.png)
![[text]](/fct/images/ntriples_doc.png)
![[turtle]](/fct/images/n3turtle_doc.png)
![[ld+json]](/fct/images/jsonld_doc.png)
![[rdf+json]](/fct/images/json_doc.png)
![[rdf+xml]](/fct/images/xml_doc.png)
![[atom+xml]](/fct/images/atom_doc.png)
![[html]](/fct/images/html_doc.png)