| schema:text
| - കേരളത്തിലെ സാമൂഹിക-രാഷ്ട്രീയ കാഴ്ചപ്പാടുകളെ ഉടച്ചുവാര്ക്കുന്നതിന് നിര്ണ്ണായക പങ്കുവഹിച്ച സമരമായിരുന്നു ഗുരുവായൂര് സത്യാഗ്രഹം(1931-32). ഗാന്ധിജിയും ടാഗോറും ഇടപെടല് നടത്തിയ ഈ സമരത്തിന് പിന്മുറക്കാരോട് പറയാന് ഏറെ ചരിത്രവുമുണ്ട്. പിന്നോക്കക്കാര്ക്ക് പ്രവേശനമില്ലാതിരുന്ന കേരളത്തിലെ ക്ഷേത്രങ്ങളെക്കുറിച്ച് കോണ്ഗ്രസിന്റെ മുംബൈ ദേശീയ സമ്മേളനത്തില് സംസാരിക്കവെ കെ.കേളപ്പന് സൂചിപ്പിച്ചു. തുടര്ന്ന് ഗാന്ധിജി ഇക്കാര്യം കേളപ്പജിയുമായി സംസാരിക്കുയും സമരം തുടങ്ങാന് നിര്ദ്ദേശിക്കുകയുമായിരുന്നു. നിരാഹാരം ആരംഭിച്ചതോടെ സമരം എത്രയും വേഗം ഒത്തു തീര്പ്പാക്കാന് കോഴിക്കോട് സാമൂതിരിക്ക് കത്തയച്ചത് മഹാകവി രവീന്ദ്രനാഥ് ടാഗോള് ആയിരുന്നു.
2021ലെ കേരളപ്പിറവി ദിനത്തില് ഗുരുവായൂര് സത്യാഗ്രഹത്തിന്റെ നവതി ആഘോഷിച്ചു. ഒരു വര്ഷം നീണ്ട ആഘോഷ പരിപാടികളാണ് ഇതിന്റെ ഭാഗമായി സംഘടിപ്പിച്ചത്. അതിനിടെ, ഗുരുവായൂര് സത്യാഗ്രഹ സ്മാരകത്തിന്റെ പേരില് സമൂഹമാധ്യമങ്ങളില് ചില പ്രചാരണങ്ങള് വൈറലായിട്ടുണ്ട്. സത്യാഗ്രഹത്തന് നേതൃത്വം നല്കിയ കെ.കേളപ്പനെ ഒഴിവാക്കി കൊണ്ട് എകെജിയുടെ പേരു മാത്രം ഉള്പ്പെടുത്തി സ്മാരകം പണിതു എന്നാണ് പോസ്റ്റുകള്.
'ഇതാണ് നൈസ് ആയി ചവിട്ടി പുറത്താക്കല് എന്നു പറയുന്നത്, ഒരു കമ്മയൂണിസ്റ്റ് തന്ത്രം
ക്ഷേത്ര പ്രവേശന സമരത്തിന് നിരാഹാരം കിടന്നത് ശ്രീ.കേളപ്പജിയും, ടി.കെ മാധവനുമാണ്
പക്ഷേ ഗുരുവായൂര് നഗരസഭ സ്മാരകം പണിതുയര്ത്തിയപ്പോള് ഇവര് രണ്ടുപേരെയും നൈസ് ആയി ഒഴിവാക്കിയിട്ട് എകെജിയുടെ പേര് നല്കി' എന്നുള്ള പോസ്റ്റിന്റെ പൂര്ണ്ണരൂപം താഴെ കാണാം.
എന്നാല്, പ്രചാരത്തിലുള്ള പോസ്റ്റ് തെറ്റിദ്ധരിപ്പിക്കുന്നതാണെന്ന് ഇന്ത്യാ ടുഡേയുടെ ആന്റി ഫേക്ക് ന്യൂസ് വാര് റൂം(AFWA) കണ്ടെത്തി. എകെജിക്ക് മാത്രമല്ല, കെ.കേളപ്പനും മറ്റ് സമര നേതാക്കള്ക്കും ഇവിടെ സ്മാരകങ്ങളുണ്ട്.
AFWA അന്വേഷണം
ഗുരുവായൂര് സത്യാഗ്രഹം സ്കൂള് കാലഘട്ടം മുതല് ചരിത്ര പാഠങ്ങളില് വിഷയമാണ്. സമരത്തിന് നതൃത്വം നല്കിയവരില് കെ.കേളപ്പനും എകെജിയും മറ്റ് അനവധി പ്രമുഖരമുണ്ടായിരുന്നു. ഗുരുവായൂര് നഗരസഭ ഇത്തരത്തില് എകെജിയുടെ പേരില് മാത്രം ഒരു സ്മാരകം പണിതുയര്ത്തിയാല് അത് ചര്ച്ചയാകേണ്ടതാണ്. എന്നാല് ഇതുസംബന്ധിച്ച് മാധ്യമ വാര്ത്തകളോ മറ്റ് രേഖകളോ ഒന്നും തന്നെ കണ്ടെത്താനായില്ല. തുടര്ന്ന് ഞങ്ങള് ഇക്കാര്യത്തെക്കുറിച്ച് വിശദമായി അറിയുന്നതിന് ഗുരുവായൂര് നഗരസഭാ ചെയര്മാന് എം.കൃഷ്ണദാസിനെ ബന്ധപ്പെട്ടു. അദ്ദേഹം നല്കിയ വിവരം അനുസരിച്ച് പ്രചാരത്തിലുള്ള പോസ്റ്റുകള് തികച്ചും വ്യാജമാണ്.
' ഗുരുവായൂരിന്റെ ചരിത്രത്തിലെ പ്രധാന ഏടാണ് ഗുരുവായൂര് സത്യാഗ്രഹം. ഈ സമരത്തില് പങ്കെടുത്ത എല്ലാ നേതാക്കള്ക്കും നഗരസഭ തുല്യപ്രാധാന്യം നല്കിയിട്ടുണ്ട്. എകെജി സ്മാരക സത്യാഗ്രഹ കവാടം ഇവിടെയുണ്ട് എന്നത് സത്യമാണ്. എന്നാല് അതിന് നേരെ എതിര്ദിശയില് കേളപ്പജി സ്മാരക കവാടവുമണ്ട്. ഇക്കാര്യം അറിയാതെയോ, മറച്ചുവച്ചോ ആണ് ഇപ്പോള് ഈ അനാവശ്യ വിവാദം എന്ന് പറയേണ്ടിരിക്കുന്നു. ഏകദേശം ഒന്നരയേക്കറോളം വരുന്ന ഒരു ഗ്രൗണ്ടാണ് ഗുരുവായൂര് സ്മാരകത്തിനായി ഉള്ളത്. 2000ലാണ് ഇത് ചുറ്റുമതില്ക്കെട്ടി സത്യാഗ്രഹ സ്മാരകത്തിനായി വിവിധ നിര്മാണങ്ങള് ആരംഭിച്ചത്. ഗ്രൗണ്ടിനുള്ളില് ഒരു സ്റ്റേജുണ്ട്. ക്ഷേത്രപ്രവേശന സ്മാരക സത്യാഗ്രഹ സ്റ്റേജ് എന്ന് നാമകരണം ചെയ്ത ഇതിന്റെ ഉദ്ഘാടനം മുഖ്യമന്ത്രി പിണറായി വിജയനാണ് നിര്വഹിച്ചത്.
സ്മാരക ഗ്രൗണ്ടില് സാംസ്ക്കാരിക പരിപാടികളും മറ്റ് പൊതു പരിപാടികളും നടത്താന് വിശാലമായ സൗകര്യമുണ്ട്. ഗ്രൗണ്ടിനുള്ളില് പ്രവേശിക്കാന് നാല് കവാടങ്ങളാണ് വിഭാവനം ചെയ്തിട്ടുള്ളത്. വടക്ക് ഭാഗത്തുള്ള എകെജി കവാടം, തെക്ക് കേളപ്പജി കവാടം എന്നിവയുടെ നിര്മാണം കഴിഞ്ഞല്ലോ. ഇനി കിഴക്ക്, പടിഞ്ഞാറ് ദിശകളില് പണിയുന്ന രണ്ട് കവാടങ്ങള്ക്ക് കൗണ്സില് നിര്മാണാനുമതി നല്കിയിട്ടുണ്ട്. ഇവ ഉടന് ആരംഭിക്കും. ഇവയിലൊന്ന് മന്നത്ത് പത്മനാഭന്റെ പേരിലും മറ്റൊന്ന് സുബ്രഹ്മണ്യന് തിരുമുമ്പിന്റെ പേരിലുമാണ്.
മറ്റ് സത്യാഗ്രഹ നേതാക്കളുടെ പേരിലും സ്മാരകങ്ങളുണ്ട്. പി.കൃഷ്ണപിള്ളയാണ് ക്ഷേത്രത്തിനുള്ളില് കടന്ന് മണിയടിച്ച് സമരം ശ്രദ്ധയാകര്ഷിക്കുന്ന തലത്തിലേക്ക് എത്തിച്ചത്. പടിഞ്ഞേറെ നടയിലുള്ള ഒരു ഗ്രൗണ്ട് കൃഷ്ണപിള്ള സ്ക്വയര് എന്ന് നാമകരണം ചെയ്തിട്ടുണ്ട്. ഇനി മറ്റൈാരു സ്മാരകം ഗുരുവായൂര് സത്യാഗ്രഹ ക്യാമ്പിന്റെ മാനേജറായിരുന്ന എ.സി.രാമന്റെ പേരിലാണ്. ഗുരുവായൂര് കാരനാണ് അദ്ദേഹം. പൊന്നാനി താലൂക്ക് കോണ്ഗ്രസ് കമ്മറ്റിയുടെ പ്രസിഡന്റ് ആയിരുന്ന എ.സി രാമന്റെ പേരില് ഒരു ചില്ഡ്രന്സ് പാര്ക്ക് അടുത്ത ദിവസം ഉദ്ഘാടനം ചെയ്യും. ഇത്തരത്തില് സത്യാഗ്രഹ സമരത്തില് പങ്കെടുത്ത എല്ലാ നേതാക്കള്ക്കും നഗരസഭ ഒരുപോലെ പരിഗണന നല്കി, അവരുടെ ഓര്മ നിലനിര്ത്തുന്നുണ്ട്. തീര്ച്ചയായും ഇനിയും ഒരുപാട് നേതാക്കള് സ്മരിക്കപ്പെടേണ്ടവരാണ്. പ്രധാനപ്പെട്ട നേതാക്കള്ക്കെല്ലാം സാധ്യമായ രീതിയില് ഓരോ കാലഘട്ടത്തിലും പരിഗണന നല്കി വരും. ഒരുപക്ഷേ രാഷ്ട്രീയമായി വിരോധമുള്ളവരാകാം ഇപ്പോഴുള്ള പ്രചാരണത്തിന് പിന്നില്' മുനിസിപ്പല് ചെയര്മാന് ഇന്ത്യാ ടുഡേയോട് പറഞ്ഞു.
കെ.കേളപ്പന് സ്മാരക കവാടത്തിന്റെ ചിത്രവും സ്മാരകവുമായി ബന്ധപ്പെട്ട പരിപാടികളുടെ വിശദാംശങ്ങളും എ.കൃഷ്ണദാസ് ഞങ്ങളുമായി പങ്കിട്ടു. ഇവയില് ചിലത് താഴെ കാണാം.
ഗുരുവായൂര് സത്യാഗ്രഹ സ്മാരകങ്ങള് സംബന്ധിച്ച് രാഷ്ട്രീയമായ തര്ക്കങ്ങളുണ്ടോ എന്നും ഞങ്ങള് പരിശോധിച്ചു. എന്നാല് ഇത്തരമൊരു തര്ക്കങ്ങളൊന്നും തന്നെ നഗരസഭയില് ഇല്ലെന്ന് പ്രതിപക്ഷ കൗണ്സിലറായ കോണ്ഗ്രസ് പ്രതിനിധി ബി.വി ജോയ് വ്യക്തമാക്കി. 'എകെജി കവാടവും കേളപ്പജി കവാടവും ഇവിടെയുണ്ട്. മറ്റ് രണ്ട് കവാടങ്ങള് ഉടന് നിര്മിക്കാന് കൗണ്സില് അനുമതി നല്കിയിട്ടുണ്ട്. ഇവിടെ സ്മാരകവുമായി ബന്ധപ്പെട്ട് പ്രത്യേക തര്ക്കങ്ങളൊന്നുമില്ല' കൗണ്സിലര് പറഞ്ഞു.
സമൂഹമാധ്യമങ്ങളിലെ പോസ്റ്റില് ഉള്പ്പെട്ട മറ്റൊരു തെറ്റാണ് ടി.കെ മാധവന് എന്ന പേര്. ഗുരുവായൂര് സത്യാഗ്രഹത്തില് ടി.കെ മാധവന് പങ്കെടുത്തിട്ടില്ല. വൈക്കം സത്യാഗ്രഹത്തിലെ നേതാക്കളില് ഒരാളായിരുന്നു അദ്ദേഹം. 1930ല് അതായത് ഗുരുവായൂര് സത്യാഗ്രഹം ആരംഭിക്കുന്നതിന് ഒരു വര്ഷം മുന്പ് ടി.കെ മാധവന് മരണമടഞ്ഞു.
അതേസമയം, കെ.മാധവന് ഗുരുവായൂര് സത്യാഗ്രഹത്തില് പങ്കെടുത്തിരുന്നു. 2016ല് 101-ാം വയസിലാണ് അദ്ദേഹം അന്തരിച്ചത്. അന്ന് 15 കാരനായിരുന്ന കെ.മാധവന്, ഉപ്പു സത്യാഗ്രഹത്തില് പങ്കെടുത്ത യുവ വോളണ്ടിയറുമായിരുന്നു.
മറ്റൊരു ശ്രദ്ധേയമായ കാര്യം വൈക്കം സത്യാഗ്രഹം, ഗുരുവായൂര് സത്യാഗ്രഹം എന്നിവയൊക്കെ നടക്കുമ്പോള് എകെജി, കൃഷ്ണപിള്ള തുടങ്ങിയവര് കോണ്ഗ്രസ് നേതാക്കളായിരുന്നു. പില്ക്കാലത്താണ് ഇവര് മാര്ക്സിസ്റ്റ് പാര്ട്ടി രൂപീകരിച്ചതും കമ്മ്യൂണിസ്റ്റ് നേതാക്കളായതും.
ലഭ്യമായ വിവരങ്ങളില് നിന്ന് ഗുരുവായൂര് സത്യാഗ്രഹ സ്മാരക കവാടം എകെജിയുടെ പേരില് പണിതുകൊണ്ട് സമരനായകനായ കെ.കേളപ്പനെയും മറ്റ് നേതാക്കളെയും നഗരസഭ തഴഞ്ഞെന്ന വാദം തെറ്റിദ്ധരിപ്പിക്കുന്നതാണെന്ന് വ്യക്തം.
കെ.കേളപ്പന് ഉള്പ്പെടെയുള്ള നേതാക്കളെ തഴഞ്ഞുകൊണ്ട് ഗുരുവായൂര് സത്യാഗ്രഹ സ്മാരകത്തില് എകെജിയുടെ പേര് മാത്രം എഴുതി.
ഗുരുവായൂര് സത്യാഗ്രഹ സ്മാരകത്തിന്റെ ഒരു കവാടമാണ് എകെജി സ്മാരക കവാടം എന്നറിയപ്പെടുന്നത്. നാലു കവാടങ്ങളുള്ള സ്മാരക ഗ്രൗണ്ടിന്റെ എതിര്ഭാഗത്തെ കവാടം കെ.കേളപ്പന്റെ പേരിലാണ് നാമകരണം ചെയ്തിട്ടുള്ളത്. സത്യാഗ്രഹത്തിലെ മറ്റ് പ്രധാന നേതാക്കള്ക്കും ഗുരുവായൂരില് സ്മാരകങ്ങളുണ്ട്.
|
![[RDF Data]](/fct/images/sw-rdf-blue.png)
![[cxml]](/fct/images/cxml_doc.png)
![[csv]](/fct/images/csv_doc.png)
![[text]](/fct/images/ntriples_doc.png)
![[turtle]](/fct/images/n3turtle_doc.png)
![[ld+json]](/fct/images/jsonld_doc.png)
![[rdf+json]](/fct/images/json_doc.png)
![[rdf+xml]](/fct/images/xml_doc.png)
![[atom+xml]](/fct/images/atom_doc.png)
![[html]](/fct/images/html_doc.png)