| schema:text
| - കേരള ലോട്ടറിയുടെ ചരിത്രത്തിലെ ഏറ്റവും വലിയ സമ്മാനം നല്കിയാണ് ഇത്തവണത്തെ ഓണം ബംപര് ലോട്ടറി താരമായത്. 25 കോടി രൂപയാണ് ഒന്നാം സമ്മാനം നല്കുന്നത്. സമ്മാനത്തുക ഉയര്ത്തിയതുകൊണ്ടു തന്നെ റെക്കോര്ഡ് വില്പനയാണ് നടന്നിട്ടുള്ളത്. സെപ്റ്റംബര് 18ന് നടന്ന നറുക്കെടുപ്പില് തിരുവനന്തപുരം സ്വദേശിയായ അനൂപിനാണ് ഒന്നാം സമ്മാനമായ 25 കോടി രൂപ ലഭിച്ചത്. അതിനിടെ ഓണം ബംപറില് പ്രഖ്യാപിച്ച നാലാം സമ്മാനം 90 പേര്ക്ക് എന്നുള്ളത് തട്ടിപ്പാണെന്നും ഈ സമ്മാനം ഒരാള്ക്ക് മാത്രമെ നല്കുന്നുള്ളൂവെന്നും അവകാശപ്പെട്ട് സമൂഹമാധ്യമങ്ങളില് സജീവമായ പ്രചാരണമുണ്ട്.
'ഒരു ലക്ഷം വെച്ച് 90 പേര്ക്ക് എന്ന് പറഞ്ഞിട്ട് ഒരു നമ്പറിനു മാത്രം കൊടുത്തു.. ഈ കൊള്ള എല്ലാപേരും അറിയണം പരമാവധി ഷേര് ചെയ്യൂ.. പട്ടിണി പാവങ്ങളെ പറ്റിച്ചു എത്രനാള്..' എന്നുള്ള കുറിപ്പിനൊപ്പം പ്രചരിക്കുന്ന ഫേസ്ബുക്ക് പോസ്റ്റിന്റെ പൂര്ണ്ണരൂപം താഴെ കാണാം.
എന്നാല്, പ്രചരിക്കുന്ന വാദം തെറ്റിദ്ധരിപ്പിക്കുന്നതാണെന്ന് ഇന്ത്യാ ടുഡേയുടെ ആന്റി ഫേക്ക് ന്യൂസ് വാര് റൂം(AFWA) കണ്ടെത്തി. നാലാം സമ്മാനം മാത്രമല്ല, ലോട്ടറി വകുപ്പ് പ്രഖ്യാപിച്ചിട്ടുള്ള എല്ലാ സമ്മാനങ്ങളും നിയമപ്രകാരം ടിക്കറ്റുമായി എത്തുന്ന എല്ലാവര്ക്കും നല്കും.
AFWA അന്വേഷണം
പത്രത്തില് അച്ചടിച്ചുവന്ന ലോട്ടറി ഫലം, ഓണം ബംപര് ടിക്കറ്റുകള് എന്നിവ മാര്ക്ക് ചെയ്താണ് പോസ്റ്റില് നല്കിയിട്ടുള്ളത്. നാലാം സമ്മാനത്തിന്റെ കോളത്തില് ഒരു നമ്പര് മാത്രമാണ് അച്ചടിച്ച് വന്നിട്ടുള്ളത്. ലോട്ടറി നറുക്കെടുപ്പിന്റെ രീതിയെക്കുറിച്ച് അറിയാത്തവര്ക്ക് ഇതെന്തുകൊണ്ടാണെന്ന് സംശയം തോന്നാം.
ആദ്യം ഞങ്ങള് പരിശോധിച്ചത് ലോട്ടറി വകുപ്പിന്റെ വെബ്സൈറ്റില് പ്രസിദ്ധീകരിച്ചിട്ടുള്ള ഓണ്ലൈന് റിസള്ട്ടാണ്. മൂന്നാം സമ്മാനം വരെ സീരിയല് കോഡുകളും നാലാം സമ്മാനം മുതല് അവസാന അക്കങ്ങളുമാണ് ലോട്ടറി റിസള്ട്ടില് ഉള്പ്പെടുത്തുന്നത്. ഓണ്ലൈന് റിസള്ട്ടില് നിന്നുള്ള പ്രസതുത ഭാഗം താഴെ കാണാം.
ലോട്ടറി സമ്മാനം നോക്കുന്നത് എങ്ങനെ?
ഓരോ ലോട്ടറികള്ക്കും ഓരോ സീരിയല് നമ്പരുകള് നല്കാറുണ്ട്. ഇത്തവണത്തെ ഓണം ബംപറിന് TA, TB, TC, .....TJ വരെ 10 സീരിയല് നമ്പരുകളാണുള്ളത്. ഒന്നാം സമ്മാനത്തിന് നറുക്ക് വീണത് TJ 750605 എന്ന നമ്പരിനാണെന്ന് റിസള്ട്ടിലുണ്ട്. 25 കോടി രൂപ ഈ ടിക്കറ്റ് ഉടമയ്ക്ക് ലഭിക്കും. കൂടാതെ വ്യത്യസ്ഥ സീരിയലില് ഇതേ നമ്പരിലുള്ള മറ്റ് ഒന്പത് ലോട്ടറികള്ക്ക് (TA 750605, TB 750605...) സമാശ്വാസ സമ്മാനവും നല്കും.
മൂന്നാം സമ്മാനം വരെ ഇത്തരത്തില് സീരിയല് നമ്പരും ആറക്ക ലോട്ടറി നമ്പരുമുള്ള ടിക്കറ്റുകള്ക്കാണ് നല്കുന്നത്. ബാക്കിയുള്ള സമ്മാനങ്ങള് ടിക്കറ്റിന്റെ അവസാന നമ്പരുകളെ അടിസ്ഥാനമാക്കിയാണ് നല്കുന്നത്. ഇവയ്ക്ക് സീരിയല് നമ്പര് ബാധകമല്ല.
നാലാം സമ്മാനം 90 പേര്ക്ക് നല്കുന്നതെങ്ങനെ?
അവസാന അഞ്ചക്കത്തിനാണ് നാലാം സമ്മാനം ലഭിക്കുക. അതായത്, നാലാം സമ്മാനത്തിനായി നറുക്കുവീണത് 41917 എന്ന നമ്പരിനാണ്. ഈ നമ്പരില് അവസാനിക്കുന്ന എല്ലാ ടിക്കറ്റുകള്ക്കും (90 ടിക്കറ്റുകള് വരെയാണ് ഉണ്ടാവുക) ഇത് ലഭ്യമാകും. ഒരു ലക്ഷം രൂപയുടെ ഈ സമ്മാനം എല്ലാ സീരീസിലുമുള്ള ഇതേ നമ്പരില് അവസാനിക്കുന്ന ടിക്കറ്റുകള്ക്ക് ലഭിക്കും. ഒരു നമ്പര് തന്നെയാണെന്നതുകൊണ്ടാണ് ലോട്ടറി ഫലത്തില് ഇത് ആവര്ത്തിച്ച് എഴുതാത്തത്.
അഞ്ചാം സമ്മാനം മുതല് അവസാന നാലക്കത്തിനാണ് ലഭിക്കുക. ഇവയ്ക്കും സീരിയല് നമ്പര് ബാധകമല്ല.
കൂടുതല് വിശദീകരണത്തിനായി ഞങ്ങള് ലോട്ടറി വകുപ്പ് പിആര്ഓ ബി.ടി അനില് കുമാറുമായി സംസാരിച്ചു.
'ലോട്ടറി സമ്മാനം നല്കുന്നത് ഗസറ്റില് പ്രസിദ്ധീകരിച്ച കൃത്യമായ ഉത്തരവിന്റെ അടിസ്ഥാനത്തിലാണ്. ഇത്തവണത്തെ ഓണം ബംപര് ടിക്കറ്റിന്റെ സമ്മാനത്തുക നല്കി തുടങ്ങിയിട്ടുണ്ട്. നാലാം സമ്മാനത്തിന്റെ നമ്പര് ഒരു തവണ എഴുതിയത് കൊണ്ടായിരിക്കാം ഒരാള്ക്കേ കൊടുക്കൂ എന്ന പ്രചാരണം. ഇത് തീര്ത്തും തെറ്റാണ്. നാലാം സ്ഥാനത്തിനായി നറുക്കുവീണ നമ്പരില് അവസാനിക്കുന്ന എല്ലാ ഓണം ബംപര് ലോട്ടറി ടിക്കറ്റുകള്ക്കും സമ്മാനത്തുകയായ ഒരു ലക്ഷം രൂപ ലഭിക്കും. ഇതിന് സീരിയല് നമ്പര് ബാധകമല്ല. നിയമപ്രകാരമുള്ള രേഖകളോടൊപ്പം ലോട്ടറി ഹാജരാക്കുന്ന എല്ലാവര്ക്കും ഈ തുക ലഭിക്കും.
അച്ചടിക്കാന് അനുമതി നല്കിയ കണക്കുകള് പ്രകാരം ഈ നമ്പരുള്ള പരമാവധി 90 ടിക്കറ്റുകളാണ് ഉണ്ടാകാന് സാധ്യത. അതിനാലാണ് ഈ സമ്മാനത്തുക 90 പേര്ക്ക് ലഭിക്കുന്നത്. സീരിയല് നമ്പരുകള് ബാധകമല്ലാത്ത ടിക്കറ്റുകള്ക്ക് ഈ രീതിയിലാണ് സമ്മാനം നല്കുന്നത്. ലോട്ടറി നറുക്കെടുപ്പിന്റെ നിയമാവലി പരിശോധിച്ചാല് ഇക്കാര്യം ബോധ്യമാകും. ' പിആര്ഓ ഇന്ത്യാ ടുഡേയോട് പറഞ്ഞു.
ഇത്തവണത്തെ ഓണം ബംപര് ലോട്ടറി സംബന്ധിച്ച് 2022 ജൂലൈ 11നാണ് ഗസറ്റ് വിജ്ഞാപനം പുറപ്പെടുവിച്ചത്. നാലാം സമ്മാനത്തിന്റെ നറുക്കെടുക്കുന്നത് ഒരു പ്രാവശ്യം ആണെന്ന് ഗസറ്റില് വ്യക്തമായി എഴുതിയിട്ടുണ്ട്. ഒരേ നമ്പരിനാണ് സമ്മാനം എന്നതിനാല് ഇത് 90 പ്രാവശ്യം നറുക്കെടുക്കേണ്ടതില്ല, സമാനമായി 90 പ്രാവശ്യം റിസള്ട്ടില് അച്ചടിക്കേണ്ട ആവശ്യവുമില്ല. ഗസറ്റില് നിന്നുള്ള പ്രസക്ത ഭാഗം താഴെ കാണാം.
മുന്പ് ബംപര് ലോട്ടറികള്ക്ക് അവകാശികളില്ല, വിറ്റഴിക്കാത്ത ടിക്കറ്റിനാണ് നറുക്ക് വീഴുന്നത് എന്ന രീതിയില് പ്രചാരണം ശക്തമായപ്പോള് ലോട്ടറി നറുക്കെടുപ്പ് രീതികള് വിശദമാക്കി കൊണ്ട് ഇന്ത്യാ ടുഡേ നല്കിയ ഫാക്ട് ചെക്ക് റിപ്പോര്ട്ട് ഇവിടെ വായിക്കാം.
ലഭ്യമായ വിവരങ്ങളില് നിന്ന് ഓണം ബംപര് ലോട്ടറിയുടെ സമ്മാനത്തുകയുമായി ബന്ധപ്പെട്ട് പ്രചാരത്തിലുള്ള പോസ്റ്റുകള് തെറ്റിദ്ധരിപ്പിക്കുന്നതാണെന്ന് വ്യക്തം.
ഓണം ബംപറിലും തട്ടിപ്പ്, നാലാം സമ്മാനം 90 പേര്ക്കെന്ന് പ്രഖ്യാപിച്ചിട്ട് ഒരാള്ക്ക് മാത്രമാണ് നല്കുന്നത്.
ഓണം ബംപര് നാലാം സമ്മാനം അവസാന അഞ്ചക്ക നമ്പരിനാണ് ലഭിക്കുന്നത്. ഇത്തവണ 41917 എന്ന നമ്പരില് അവസാനിക്കുന്ന ടിക്കറ്റുകള്ക്കാണ് സമ്മാനം. സീരിയല് നമ്പരുകള് ബാധകമല്ലാതെ പരമാവധി 90 പേര്ക്ക് വരെ ഇത് ലഭ്യമാകും. ടിക്കറ്റും നിയമപ്രകാരമുള്ള രേഖകളും ഹാജരാക്കുന്ന എല്ലാവര്ക്കും സമ്മാനം ലഭിക്കും.
|
![[RDF Data]](/fct/images/sw-rdf-blue.png)
![[cxml]](/fct/images/cxml_doc.png)
![[csv]](/fct/images/csv_doc.png)
![[text]](/fct/images/ntriples_doc.png)
![[turtle]](/fct/images/n3turtle_doc.png)
![[ld+json]](/fct/images/jsonld_doc.png)
![[rdf+json]](/fct/images/json_doc.png)
![[rdf+xml]](/fct/images/xml_doc.png)
![[atom+xml]](/fct/images/atom_doc.png)
![[html]](/fct/images/html_doc.png)