schema:text
| - Video e para dy viteve ripublikohet duke pretenduar rrejshëm se është aktuale
Deklarata
Forcat të shumta të Forcave Speciale po shkojnë në veri për të mbrojtur kufurin e Kosovës. Shpërndaje sa më shumë
Vlerësimi
Rrenë
Mbishkrimi i videos së publikuar nga faqja “Forcat Speciale”: Forcat të shumta të Forcave Speciale po shkojnë në veri për të mbrojtur kufurin e Kosovës” – është i rremë. Kjo video nuk është realizuar më 24 shtator 2023, siç pretendohet nga kjo faqe. Video është realizuar dhe publikuar në vitin 2021.
Artikulli
Më 24 shtator 2023, faqja në Facebook me emrin “Forcat Speciale” ka publikuar një video, në të cilën shihen forca të Policisë së Kosovës duke patrulluar në veri të Kosovës.
Në përshkrimin e videos është shkruar “Forcat të shumta të Forcave Speciale po shkojnë në veri për të mbrojtur kufurin e Kosovës. Shpërndaje sa më shumë”- duke pretenduar se video është aktuale, pas vrasjes së një zyrtari policor në veri, në orët e para të mëngjesit të së dielës, 24 shtator 2023.
Krypometri përmes “Google Lens” ka gjetur se video është xhiruar para dy viteve. Me një kërkim të thjeshtë në internet, vërtetohet se video është publikuar më 21 shtator 2021, teksa Policia e Kosovës patrullonte në veriun e vendit.
Po ashtu, në Zveçan, në afërsi të Banjskës është edhe gazetarja e KALLXO.com, Adelinë Ahmeti, e cila raporton se pamjet e publikuara në këtë video nuk janë aktuale.
Në pamjet e publikuara nga faqja në Facebook ”Forcat Speciale” shihet edhe pikërisht gazetarja Ahmeti me producentin e KALLXO, Valdet Salihu.
Gazetarja Adelinë Ahmeti për Krypometrin ka thënë, se këto pamje janë të vitit 2021. “Në ato pamje jemi kolegu im Valdet Salihu dhe unë. Këto pamje janë xhiruar gjatë vitit 2021”- ka thënë Ahmeti.
|