| schema:text
| - Informacioni i rremë se ushtria e Kosovës do të vendoset në veri
Deklarata
“Ushtria E Kosovës do te vendoset ne veri per mbrojtjen e kufinit”
Vlerësimi
Rrenë
Publikimi me titull “Ushtria E Kosovës do te vendoset ne veri per mbrojtjen e kufinit” është i rremë. Krypometri ka verifikuar materialin origjinal dhe ka konstatuar se kryeministri Albin Kurtin nuk e ka thënë një deklaratë të tillë. Ndërsa burimet zyrtare të FSK-së kanë konfirmuar se nuk ka vendosje të ushtrisë në zonën e veriut.
Artikulli
Më 30.09.2023, faqja syncclipsy (arkiva) në TikTok e ka publikuar një video-material të një deklarate të kryeministrit të Kosovës, Albin Kurti. Në përshkrim të videos thuhet se “Ushtria E Kosovës do te vendoset ne veri per mbrojtjen e kufinit”.
Krypometri ka kontrolluar faktet e paraqitura në material dhe ka gjetur se përshkrimi është informacion i rremë dhe për më tepër, nuk përshtatet me përmbajtjen e videos.
Në këtë material është paraqitur Kurti gjatë fjalimit që e kishte mbajtur në mbledhjen e Këshillit të Përgjithshëm të Lëvizjes Vetëvendosje që është mbajtur më 30.09.2023. Krypometër ka vërtetuar se Albin Kurti në këtë mbledhje nuk kishte deklaruar se “ushtria e Kosovës do të vendoset në veri për mbrojtjen e kufirit”. Ai kishte folur për zotimin që e kishte bërë ish-kryeministri Hashim Thaçi ndaj KFOR-it që FSK nuk do të dislokohet në katër komunat veriore të Kosovës pa lejen paraprake të KFOR-it.
“Vigjilenca dhe gatishmëria jonë për veriun është dëshmuar që nga dita e parë e qeverisjes sonë. Është zotimi i njëanshëm ndaj NATO-s i një pararendësi tim që nuk lejon FSK-në të futet në veri, por kufiri ynë duhet të ruhet. Ky vakum që është atje duhet të mbushet dhe për këtë jemi duke shtuar bashkëpunimin me aleatët tanë ndërkombëtar dhe praninë e KFOR-it atje. Serbia duhet të ndëshkohet ndërkombëtarisht sepse sa herë s’është ndëshkuar, ajo i ka përsëritur krimet”- pati deklaruar Kurti më 30 shtator 2023, gjatë mbledhjes së Këshillit të Përgjithshëm të Lëvizjes Vetëvendosje.
Gjithashtu, Krypometri ka kontaktuar edhe me zëdhënësin e FSK-së, Vëllaznim Qerimi, i cili ka thënë se informacioni i paraqitur, është i rremë.
“Është e rreme. Videoja në fjalë s’ka të bëj asgjë me FSK-në”- ka deklaruar Qerimi në deklaratë për Krypometër.
Në anën tjetër, Sekretari i Përgjithshëm i NATO-s, Jens Stoltenberg në një konferencë për media që është mbajtur gjatë vizitës së tij në Kosovë më 20.11.2023, tha se çdo dislokim i Forcave të Sigurisë së Kosovës duhet të marrë pajtimin e NATO-s.
Në vitin 2013, kryeministri i Kosovës, Hashim Thaçi në emër të Qeverisë së Kosovës, kishte ofruar “garanci se Forca e Sigurisë së Kosovës do të ketë mundësi të ndërmarrë veprime në veri të Kosovës vetëm në bashkëveprim me KFOR-in”. Thaçi kishte dërguar letër për këtë zotim tek ish-shefi i NATO-s, Anders Fogh Rasmussen.
|
![[RDF Data]](/fct/images/sw-rdf-blue.png)
![[cxml]](/fct/images/cxml_doc.png)
![[csv]](/fct/images/csv_doc.png)
![[text]](/fct/images/ntriples_doc.png)
![[turtle]](/fct/images/n3turtle_doc.png)
![[ld+json]](/fct/images/jsonld_doc.png)
![[rdf+json]](/fct/images/json_doc.png)
![[rdf+xml]](/fct/images/xml_doc.png)
![[atom+xml]](/fct/images/atom_doc.png)
![[html]](/fct/images/html_doc.png)